Aymaqlıq dúzilisi

Qaraqalpaqstan Respublikası Ózbekstannıń arqa-batıs bóliminde, Ámiwdáryanıń tómengi jaǵında, Aral teńiziniń túslik jaǵalarında jaylasqan. Respublika túslik-batıs tárepten Qaraqum shóline tutasqan. Onıń arqa-batısında Ústirt tegisligi, arqa-shıǵıs tárepinde bolsa Qızılqum shóli bar. Aral teńiziniń túslik aymaǵı qaraqalpaq jerinde jaylasqan. Qaraqalpaqstannıń ulıwma jer maydanı 166,6 mıń kvadrat kilometrden ibarat bolıp, ol aymaǵınıń úlkenligi jaǵınan Ózbekstan Respublikası wálayatları arasında birinshi orında turadı. Xorezm, Nawayı hám Buxara wálayatları menen shegaralas. Respublikanıń hákimshilik-aymaqlıq dúzilisi 16 rayon hám 1 qaladan ibarat. Bular – Ámiwdárya, Beruniy, Qaraózek, Kegeyli, Bozataw, Qońırat, Qanlıkól, Moynaq, Nókis, Taxtakópir, Tórtkúl, Xojeli, Taqıyatas, Shımbay, Shomanay, Ellikqala rayonları menen Nókis qalası.