Qaraqalpaqstan Respublikası Ministrler Keńesiniń Baslıǵı F.Ermanov Qıtay mámleketinen kelgen investorlar menen ushırastı.

Ushırasıwda Ministrler Keńesiniń Baslıǵı F.Ermanov húrmetli Prezidentimizdiń basshılıǵında elimizde isbilermenlikti rawajlandırıw, olar ushın barlıq qolaylı sharayatlardı jaratıw maqsetinde alıp barılıp atırǵan keń kólemli reformalar, sonday-aq, Qaraqalpaqstan ushın qabıl etilgen tariyxıy párman hám qararlar bul baǵdardaǵı ilajlar kólemin jańa basqıshqa kóterip atırǵanın ayrıqsha atap ótti. Óz gezeginde Qıtaylı investorlar da elimizde isbilermenlerge berilip atırǵan úlken imkaniyatlar haqqında ózleriniń unamlı pikirlerin aytıp ótti. Ushırasıw dawamında Respublikamızda jún hám terini qayta islew boyınsha zamanagóy kárxana shólkemlestiriw máselesi dodalandı. Tárepler birge islesiw shártleri, texnologiyalıq processler hám investiciya muǵdarı boyınsha pikir alıstı. Qıtaylı investorlar bul joybardıń potencialın joqarı bahalap, zamanagóy texnologiyalar hám joqarı sapalı úskenelerdi engiziw arqalı jergilikli óndiris nátiyjeliligin arttırıwdı usınıs etti. Sonday-aq, jańa kárxanada kóplegen jumıs orınları jaratılatuǵını hám jergilikli shiyki zattı nátiyjeli qayta islew imkaniyatı payda bolatuǵını atap ótildi. Bul baslama arqalı jún hám teri ónimlerin qayta islew sanaatı jańa basqıshqa kóteriliwi hám eksportqa qolaylı ónimler islep shıǵarıwǵa tiykar jaratılıwı kútilmekte.