Qaraqalpaqstan Respublikası fermerler keńesiniń Konferenciya májilisi bolıp ótti.

Ózbekstan Respublikası Prezidentiniń 2025-jıl 14-fevraldaǵı “Qıytaq jer iyeleri hám diyqan xojalıqlarınıń jumısında zamanagóy shólkemlestiriw sistemasın engiziw hám finanslıq qollap-quwatlawdıń qosımsha ilajları haqqında”ǵı PP-22-sanlı Pármanı qabıl etildi. Usı párman menen Ózbekstan fermer, diyqan xojalıqları hám qıytaq jer iyeleri keńesi Ózbekstan fermerleri keńesi sıpatında qayta shólkemlestiriliwi belgilengenligi múnásibeti menen búgin Qaraqalpaqstan fermer, diyqan xojalıqları hám qıytaq jer iyeleri keńesiniń konferenciya májilisi bolıp ótti. Konferenciyada Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A.Jumanazarov, Ózbekstan fermer, diyqan xojalıqları hám qıytaq jer iyeleri keńesiniń bólim baslıǵı M.Muxammadiev, rayonlardan saylanǵan wákiller, fermer xojalıqları hám basqa da shólkemlerdiń basshıları qatnastı. Konferenciyada tiykarǵı 3 másele kórip shıǵıldı. Onda Qaraqalpaqstan fermer, diyqan xojalıqları hám qıytaq jer iyeleri Keńesi – Qaraqalpaqstan fermerler keńesi sıpatında qayta shólkemlestirildi. Sonday-aq, Ózbekstan fermerleri keńesinde bolıp ótetuǵın Konferenciyaǵa delegatlar hám Qaraqalpaqstan fermerleri keńesi prezidium aǵzaları saylandı. Konferenciya qararı menen, Yunusov Ilxambay Kuchkarovich Qaraqalpaqstan fermerler keńesiniń baslıǵı etip saylandı.