Kompetenciyanı rawajlandırıw institutınıń Nókis filialı shólkemlestirildi
Ózbekstan Respublikası Prezidentiniń 2023-jıl 28-avgusttegi “Administrativlik reformalar sheńberinde qurılıs hám úy-jay kommunal xojalıǵı tarawında mámleketlik basqarıwdı nátiyjeli shólkemlestiriw is-ilajları haqqında”ǵı PP151-sanlı pármanı hámde Ministrler Kabinetiniń 2023-jıl 11-sentyabrdegi “Qala qurılısı hám úy-jay kommunal xojalıǵı tarawında qánigelerdi sertifikatlaw sistemasın engiziw haqqında”ǵı 460-sanlı qararına tiykar, qala qurılısı hám úy-jay kommunal xojalıǵı tarawları qánigeleriniń mamanlıǵın arttırıw, sertifikatlaw sisteması boyınsha Qurılıs hám úy-jay kommunal xojalıǵı ministrligi janında Kompetenciyanı rawajlandırıw instituti shólkemlestirilgen edi. Endi bul instituttıń Nókis filialı shólkemlestirilip, usı jıldıń yanvar ayınan baslap óz jumısın basladı.
Institutıń Nókis filialında siz:
🔹Qurılıs obektlerinde texnikalıq qadaǵalawdı alıp barıw;
🔹Qurılıs obektlerinde jumıstı bólip alıp islewshi mákemeniń ishki qadaǵalawın ámelge asırıw;
🔹Qala qurılısı hújjetlerin islep shıǵıw hám avtorlıq qadaǵalawdı alıp barıw;
🔹Joybarlaw shólkemlerinde joybar bas arxitektorı hám bas injener sıpatında jumıstı ámelge asırıw;
🔹Qurılıs obektlerinde qadaǵalaw ólshewi;
🔹Qala qurılısı hújjetlerin ekspertizalaw;
🔹Kóp kvartiralı jaylardı basqarıw;
🔹Qurılıs hám qala qurılısı tarawında mámleketlik qadaǵalaw;
🔹Arxitektura hám qurılıs basqarması;
🔹Mayıplıǵı bolǵan shaxslar ushın tosqınlıqsız ortalıq jaratıw;
🔹Qala qurılısı;
🔹Seysmikalıq izolyaciyanı qollanıw talapları hám ámeliyatı;
🔹Qurılısta “kólem” usılın engiziw kursları boyinsha óz tájiriybeńizdi arttırıwıńız múmkin boladı. “Oqıw kursları”nda buyırtpashı, joybarlaw hám jumıstı bólip alıp islewshi shólkemlerdiń qadaǵalawshıları, ekspertiza shólkemleri hám aymaqlıq inspekciyalardıń juwapker xızmetkerleri qatnasıwı múmkin. Qurılıs hám úy-jay kommunal xojalıǵı ministrligi hámmeni “oqıw kursları”nda belsene qatnasıwǵa shaqıradı.
Mánzil: Nókis qalası Almazar kóshesi 8 úy. QMU Qurılıs fakulteti imaratı