Qıtaylı investorlar menen tabıslı ushırasıwlar
Aldın xabar bergenimizdey, Qaraqalpaqstan Respublikası Ministrler Keńesiniń Baslıǵı F.Ermanov basshılıǵındaǵı delegaciya aǵzaları Qıtay mámleketiniń iri kompaniya wákilleri menen ushırasıwlar ótkerdi. Sapar dawamında Xubey provinciyasınıń Uxan qalasında “CSADI” Co., Ltd. (Central-South Architectural Design Institute) kompaniyasınıń jumısı menen jaqınnan tanıstı hám Nókis qalasında 40 kóp qabatlı turaq jay imaratın qurıw boyınsha sóylesiwler alıp barıldı. Sonday-aq, Xojeli rayonında “Jaslar sociallıq-ekonomikalıq orayı”n shólkemlestiriw boyınsha kelisimge qol qoyıwǵa kelisip alındı. Delegaciyamız aǵzaları Shandun provinciyasınıń Czinan qalasında bolıp, túrli investiciyalıq kompaniya hám shólkemler menen sóylesiwler alıp barıldı. “Shuifa Agriculture Group” Co.,Ltd kompaniyası wákilleri menen ushırasıwda “Paxta sanaatınıń kórgizbe kompleksi” joybarın ámelge asırıwǵa baylanıslı máseleler dodalandı. Sóylesiwler dawamında paxta sanaatı kompleksin shólkemlestiriw boyınsha kelisimlerge qol qoyıldı. Gezektegi mánzil Szibo qalasındaǵı Densawlıqtı saqlaw tarawında joqarı texnologiyalar mákáni bolǵan “Shıtsyao medicina orayı”na barıp, ol jerde delegaciya aǵzaları tiykarınan kem támiyinlengen shańaraqlar ushın diagnoz qoyıw arqalı keselliklerdiń aldın alıw (profilaktika) boyınsha jaratılǵan sistema menen tanıstı. Bul bolsa óz gezeginde keselliklerdiń aldın alıw, dári-dármaqlarǵa jumsalıwshı qárejetlerdi azaytıw imkaniyatın beredi. Delegaciyamız aǵzaları YUnnan provinciyasında bolıp, kótere sawda hám túrli tovarlardı jetkerip beriw menen shuǵıllanıwshı “Yiwu Basmalla” Co.Ltd” kompaniyası, avtomobiller ushın komplektlewshi bólekler hám shinalar islep shıǵarıwshı “Teng Long” Co. ltd kompaniyasınıń jumısı menen jaqınnan tanıstı hám Ózbekstan ónimlerin Dali qalasına jetkerip beriw, avtomobiller ushın awısıq bólekler hám shinalardı Qaraqalpaqstanda islep shıǵarıwdı ózlestiriw máselesin kórip shıqtı. Sapardıń gezektegi kúni delegaciyamız aǵzalarınıń qatnasıwında Qıtaydıń 80 nen aslam iri kompaniyalarınıń qatnasıwında biznes forum shólkemlestirildi. Ushırasıwlarda sawda-ekonomikalıq hám investiciyalıq birge islesiw, sonday-aq, Qaraqalpaqstanda jańa qospa investiciyalıq joybarlardı jolǵa qoyıw máselelerine toqtap ótildi. Bunnan soń Qıtaydıń 20 dan aslam kompaniyaları menen B2B sóylesiwleri ótkerildi. 
