Ózbekstan Respublikası Oraylıq banki tárepinen Qaraqalpaqstan Respublikasında balıqshılıq tarawındaǵı isbilermenler menen ushırasıw bolıp ótti.
Ózbekstan Respublikası Prezidenti basshılıǵında 2024-jıl 16-dekabr kúni banklerdiń qatnasıwında máhállelerde xalıqtıń bántligin támiyinlew hám dáramatlı etiwge qaratılǵan tiykarǵı wazıypalardı dodalaw boyınsha ótkerilgen videoselektor májilisinde berilgen tapsırmalardıń orınlanıwı sıpatında Oraylıq bank tárepinen búgin balıqshılıq baǵdarındaǵı isbilermenler menen ushırasıwlar ótkerilmekte. Usı tiykarda, búgin Qaraqalpaqstan Respublikası Nókis qalasında sawda-sanaat palatasınıń imaratında balıqshılıq baǵdarındaǵı isbilermenler menen ushırasıw bolıp ótti. Ushırasıwda Oraylıq bank baslıǵınıń orınbasarı A.Kamalov, Qaraqalpaqstan Respublikası Ministrler Keńesi Baslıǵınıń birinshi orınbasarı N.Erlepesov, sonday-aq, tarawǵa baylanıslı juwapkerler hám isbilermenler qatnastı. Bul ushırasıwdıń maqseti, aymaqta balıqshılıq tarawın bunnan bılay da rawajlandırıwda bankler tárepinen finanslıq qollap-quwatlaw hám usı baǵdarda jumıs alıp barıp atırǵan isbilermenlerdiń jumısı sheńberinde bank sistemasına tiyisli máselelerdi kórip shıǵıw bolıp esaplanadı. Ushırasıwda balıqshılıq tarawındaǵı mashqalalar, investiciyalıq imkaniyatlar hám rawajlanıw baǵdarları dodalandı. Sonday-aq, isbilermenlerge tarawdı qarjılandırıw, jańa texnologiyalardı engiziw hám balıqshılıq ónimdarlıǵın arttırıw boyınsha usınıslar bildirildi. Sonday-aq, bul ushırasıwǵa Ózbekstan Sawda-sanaat palatası, “Ózbekbalıqsanaat” associaciyası, “Isbilermenlikti rawajlandırıw kompaniyası” AJ hám “Turon bank” AKB wákilleri mirát etilgen. Búgingi kúnde aymaqta 19 isbilermenlik subektine balıqshılıq baǵdarına 15,3 milliard sum kredit ajıratıldı hám joybarlardı iske qosıw arqalı 53 jańa jumıs orınları jaratıldı. Sonıń menen birge, ushırasıw dawamında isbilermenler hám taraw wákilleri menen balıqshılıq baǵdarın rawajlandırıw boyınsha usınıslar tıńlandı hám tájiriybe almasıldı. Ilaj sheńberinde, Oraylıq bank hám Sawda-sanaat palatası tárepinen isbilermenlerge kredit baǵdarlamaları hám jeńilletilgen qarjılandırıw imkaniyatları haqqında maǵlıwmat berildi. Balıqshılıq tarmaǵındaǵı joybarlardı ámelge asırıw ushın investiciyalardı tartıw hám birge islesiwdi keńeytiw baǵdarları boyınsha pikir alısıldı.
