Nókis qalasında “Civilizaciya, mádeniyat hám aǵartıwshılıq” atamasında “Aǵartıwshılıq kárwanı” ilimiy-aǵartıwshılıq hám mádeniy úgit-násiyatlaw ushırasıwı bolıp ótti.
Bizge belgili, aǵartıwshılıq hár bir jámiyettiń rawajlanıwında áhmiyetli orın iyeleydi. Insan sanası hám kózqarasınıń qáliplesiwine tásir etiwshi bunday ruwxıy-aǵartıwshılıq ilajlar tek ǵana jas áwlad emes, al úlken jastaǵı puqaralar ushın da oǵada áhmiyetli bolıp esaplanadı. Usı múnásibet penen Nókis qalasında Qaraqalpaqstan Respublikası Ministrler Keńesi, Respublikalıq Ruwxıylıq hám aǵartıwshılıq orayı, Ózbekstandaǵı Islam civilizaciyası orayı, Ózbekstan máhálleleri associaciyası hám bir qatar shólkemler menen birgelikte ” Civilizaciya, mádeniyat hám aǵartıwshılıq” atamasında “Aǵartıwshılıq kárwanı” ilimiy-aǵartıwshılıq hám mádeniy úgit-násiyatlaw ushırasıwı bolıp ótti. Ushırasıw mámleketimiz Basshısınıń usı jıl 18-20-noyabrdegi Oliy Majlis Nızamshılıq palatası, Oliy Majlis Senatınıń birinshi jalpı májilisinde, sonday-aq, Oliy Majlis Nızamshılıq palatasınıń Ózbekstan Respublikası Bas ministri kandidaturasın kórip shıǵıwǵa baǵıshlanǵan májilisindegi shıǵıp sóylegen sóziniń mazmun-mánisin zıyalılardıń qatnasıwında keń jámiyetchilikke jetkeriwde ayrıqsha áhmiyetke iye boldı. Qalaberse, Jańa Ózbekstannıń búgingi hám erteńgi rawajlanıwın jańa basqıshqa alıp shıǵıw baǵdarında ámelge asırılǵan jumıslar, aldımızda turǵan áhmiyetli wazıypa hám maqsetler, keń kólemli reformalar haqqında tolıq maǵlıwmat beriw hám zıyalılar arasında keńnen úgit-násiyatlandı. Bul ilajlardan xalıqqa, atap aytqanda, jaslarǵa “Ózbekstan-2030” strategiyasınıń mazmun-mánisin túsindiriw, ullı ata-babalarımızdıń miyrasın qásterlep saqlaw, úyreniw hám ǵalabalıq en jaydırıw, milletleraralıq tatıwlıq, keńpeyillikti támiyinlew, watanlaslarımızdıń mámleketimizde alıp barılıp atırǵan reformalarǵa qatnas sezimin bekkemlew názerde tutılǵan. “Aǵartıwshılıq kárwanı” ilimiy-aǵartıwshılıq hám mádeniy ilajlarınıń ózine tán tárepi sonda, aymaqlardaǵı ilimpazlar, zıyalılar, kórkem-óner hám mádeniyat ǵayratkerleri, ruwxıy-aǵartıwshılıq jumıslarǵa juwapkerler, máhálle belsendileri jáne aldınǵı jaslardıń bul baǵdardaǵı bilim hám kónlikpelerin arttırıw, mámleketimizdiń milliy-ideologiyalıq baǵdarındaǵı reformaları, jámiyetti, ásirese, jaslardı buzǵınshı ideyalardan qorǵawda zıyalılardı belsendilikke shaqırıw, olar ushın pikirlesiw platformasın jaratıwdan ibarat. Áyne zıyalılardı bul jumısqa keńnen tartıw arqalı, xalqımız arasında ózligimizdi ańlaw hám tariyxıy tamırımızǵa baylanıslı bilimlerdi arttırıw maqset etilgen. 
