“Jasılawıl” mobil biznes platformasınıń prezentaciyası hám ǵalaba xabar quralları wákilleri ushın baspa sóz konferensiyası bolıp ótti.

Qaraqalpaqstan Respublikası Sawda-sanaat palatasında Agrotech Innovation Day: “Jasılawıl ‒ platforması menen keleshekti birge quramız” atamasında kórgizbe-yarmarkası tiykarında “Jasılawıl” mobil biznes platformasınıń prezentaciyası hám ǵalaba xabar quralları wákilleri ushın baspa sóz konferensiyası bolıp ótti.   Onda jetekshi qániygeler platformanıń programma hám veb-sayt formatında qollanıw imkániyatları haqqında aytıp ótti. “Jasılawıl” mobil platforması Aralboyında awıl xojalıǵı xám ekologiya tarawlarında biznes penen shuǵıllanıw ushın kerekli maǵlıwmatlardı usınadı. Bul platformada paydalanıwshılar tiyisli taraw wákilleri menen másláhatlesiwi, sonday-aq, Qaraqalpaqstannıń barlıq qala ham rayonları boylap paydalı materiallar, jańalıqlar xám xáptelik azıq-awqat baxaları menen tanısıwı múmkin. Ilaj dawamında ekspertler qatnasıwshılar ortasında kızǵın pikirge sebep bolıp atırǵan platformanı jetilistiriwge tiykar bolatuǵın jańa jónelislerdi aytıp ótti. Yaǵnıy platformanı jáne de jetilistiriw boyınsha pikir-usınıslar bildirildi. Awıl xojalıǵındaǵı innovaciyalar, suwdı tejeytuǵın texnologiyalardı engiziw, agrobiznesti qarjılandırıw hám qamsızlandırıw, sonday-aq, awıl xojalıǵı tarawında sanlı texnologiyalardıń ornı sıyaqlı áhmiyetli temalar boyınsha ekspertler, agrobiznes wákilleri hám fermerlerdiń qatnasıwı tarawda ushırasıp atırǵan mashqalalar hám imkániyatlardı anıqlawǵa tiykar jarattı. Ilajda ǵalaba xabar quralları wákilleri hám qatnasıwshılar ózlerin qızıqtırǵan sorawlarına shólkemlestiriwshiler tárepinen juwaplar aldı.