Muxtar Áwezov atındaǵı Qazaq milliy drama teatrı 6-8-sentyabr kúnleri Respublikamızǵa dóretiwshilik saparın ámelge asırmaqta.
Muxtar Áwezov atındaǵı Qazaq milliy drama teatrı 6-8-sentyabr kúnleri Respublikamızǵa dóretiwshilik saparın ámelge asırmaqta. Usı múnásibet penen Qaraqalpaqstan Respublikası Ministrler Keńesi hám Qaraqalpaqstan Respublikası Mádeniyat ministrligi shólkemlestiriwinde ǵalaba xabar quralları wákilleri ushın baspasóz konferenciyası bolıp ótti. Muxtar Áwezov atındaǵı Qazaq milliy drama teatrı jámááti 6-sentyabr kúni Berdaq atındaǵı Qaraqalpaq mámleketlik akademiyalıq muzıkalı teatrı aldında saltanatlı túrde kútip alındı. Bunnan soń teatr foesinde «Qaraqalpaqstan hám Qazaqstan teatr óneriniń doslıǵı» atamasındaǵı kórgizbeni tamasha etip, teatr jámáátiniń dóretiwshilik saparına baylanıslı baspasóz konferenciyasına qatnastı.Konferenciyada Qaraqalpaqstan Respublikası Ministrler Keńesiniń málimleme xızmeti baslıǵı Bektursın Xojanov, Qaraqalpaqstan Respublikası Mádeniyat ministrligi sektor baslıǵı Bayram Aytmuratov, M.Áwezov atındaǵı Qazaq milliy drama teatrı direktorı Juasbek Erkin Tileuqul ulı, usı teatr rejissyorı Elik Nursultan hám teatrdıń dóretiwshilik jámááti menen ǵalaba xabar quralları wákilleri qatnastı. Sońǵı jıllarda Ózbekstan hám Qazaqstan Respublikaları arasındaǵı siyasiy, sociallıq-ekonomikalıq, mádeniy baylanıslar bekkemlenip, xalıqlarımızdıń kóp ásirlik doslıq hám tuwısqanlıq qarım-qatnasları jańa basqıshqa kóterildi. Ásirese, kórkem óner hám mádeniyat tarawında ózara birge islesiw, tájiriybe almasıw boyınsha bir qatar jumıslar ámelge asırılmaqta. Atap aytqanda, Berdaq atındaǵı Qaraqalpaq mámleketlik akademiyalıq muzıkalı teatrı usı jıldıń aprel ayında Qazaqstan Respublikasında gastrol saparında boldı. Ǵalaba xabar quralları wákilleri teatr jámááti hám juwapkerlerden dóretiwshilik saparǵa baylanıslı ózlerin qızıqtırǵan sorawlarına juwaplar aldı. Dóretiwshilik sapar dawamında teatr jámááti 6-sentyabr kúni saat 17:00 de Ǵabit Músirepovtıń «Qız Jibek» muzıkalıq draması, 7-sentyabr kúni saat 17:00de akademiyalıq teatrda, saat 19:30 Qaraqalpaq mámleketlik Jas tamashagóyler teatrında Aleksandr Volodinniń «Xoshlasqım kelmeydi!..» draması, 8-sentyabr kúni saat 17:00 Sáwle Dosjanovanıń «Muhabbat penen hásiret» dramasın tamashagóylerge usınadı. 
