Nókis qalasında jaylasqan “Nókis elektroapparat” qospa kárxanasına Press-tur shólkemlestirildi.

Aldın xabar bergenimizdey, 23-avgust kúni Nókis qalasında jaylasqan quyash panellerin islep shıǵarıwǵa mólsherlengen “Nókis elektroapparat” qospa kárxanasınıń islep shıǵarıw processleri menen jaqınnan tanısıw maqsetinde press-tur shólkemlestirildi. 2017-jılı iske túsken bul kárxana dáslep elektr energiyası tarmaǵı ushın kernew qurılmaların islep shıǵarıw menen shuǵıllanıp kelgen bolsa, 2024-jıldıń iyun ayınan baslap 10 million dollardan aslam qarjı esabınan quyash panellerin islep shıǵarıw joybarın ámelge asırdı. Úskeneler Koreya Respublikasınan alıp kelinip, islep shıǵarıw 100 payız avtomatlastırılǵan. Bul qospa kárxana ishki bazarda talap joqarı bolǵan ónimdi ózimizde islep shıǵarıw menen birge 4 million dollarlıq eksport imkaniyatına da iye boldı. 70 adam jumıs penen támiyinlendi. Zavodtıń ózinde de 125 kilovatt quwatlılıqtaǵı quyash panelleri ornatılǵan. Onnan alınǵan elektr energiyası ishki mútájlikler ushın jumsaladı, artıqshası aymaqlıq elektr tarmaqlarına satıladı. Tábiyiy gazden paydalanıwdı azaytıw hám qayta tikleniwshi energiya dereklerinen paydalanıw kólemin keńeytiw maqsetinde ámelge asırılıp atırǵan bul qospa kárxana press-tur qatnasıwshılarında úlken qızıǵıwshılıq oyattı. Press-tur qatnasıwshıları bul qospa kárxananıń islep shıǵarıw processleri, jumısshı-xızmetkerler ushın jaratılǵan sharayatlar menen jaqınnan tanıstı. Bul kárxananıń búgingi kúndegi áhmiyeti hám keleshektegi nátiyjeliligi haqqında ǵalaba xabar quralları wákilleri, jurnalist hám blogerlerge maǵlıwmatlar berildi.