Rásmiy múnásibet

Sociallıq tarmaqlardıń birinde Qaraqalpaqstan Respublikası Ministrler Keńesiniń rásmiy veb-saytınıń iskerligi boyınsha pikirler bildirilgen. Bul boyınsha Qaraqalpaqstan Respublikası Ministrler Keńesiniń málimleme xızmeti tómendegilerdi málimleydi. 2024-jıldıń fevral ayınan baslap Qaraqalpaqstan Respublikası Ministrler Keńesiniń kiber qáwiplerge qarsı hám turaqlı túrde jumıs alıp barıwı ushın jańa zamanagóy kórinistegi rásmiy veb-saytı iske qosıldı. Bul saytqa búgingi kúnge shekem elimizdiń sociallıq-ekonomikalıq rawajlanıw jolındaǵı áhmiyetli normativ huqıqıy hújjetler, ashıq maǵlıwmatlar, mámleketlik uyımlar haqqındaǵı maǵlıwmatlar, sonıń menen birgelikte korrupciyaǵa qarsı gúresiw menen baylanıslı alıp barılıp atırǵan is-ilajlar jaylastırılǵan. Sonıń menen bir qatarda, basqa da áhmiyetli jańalıqlar, daǵazalar, Húkimet basshılarınıń investorlar menen ushırasıwları, puqaralardıń múrájatları hám kóshpeli qabıllawları turaqlı túrde járiyalanıwı hám qosımsha maǵlıwmatlar menen tolıqtırıw ilajları alıp barılmaqta. Bunnan tısqarı, rásmiy veb-sayttıń: • Telegram – https://t.me/QResMinistrlerKenesi • Feysbuk – https://www.fb.com/groups/karakalpakstan.uz • Instagram – https://instagram.com/qr.ministrlerkenesi sociallıq tarmaqlarında betleri shólkemlestirilgen. Ministrler Keńesiniń rásmiy veb-saytına bolǵan itabarı ushın sheksiz minnetdarshılıq bildirilgen halda Ministrler Keńesiniń Málimleme xızmeti tárepinen belgilengen tártipte bárshe ǵalaba xabar qurallarınıń wákilleri menen birge islesiwge tayar ekenligin málim etip bildiriledi.