MQX Qaraqalpaqstanda IIB baslıǵı orınbasarın para ústinde qolǵa aldı
Qaraqalpaqstanda puqaraǵa tiyisli bolǵan sırdı áshkára etiw arqalı, óz lawazımınan paydalanǵan halda, puqaranı juwapkershilikke tartpaqshı bolǵan ishki isler bóliminiń lawazımlı shaxsı aldawshılıqta ayıplanbaqta. Ol bul is-háreketin ámelge asırmawı ushın esesine puqaradan iPhone 15 Pro Max talap etken. Puqara MQX Qaraqalpaqstan Respublikası boyınsha basqarmasına múráját etip, Qońırat rayonı IIB baslıǵı orınbasarın juwapkershilikke tartıwdı soraǵan. Múrájátshiniń málim etiwinshe rayon ishki isler bólimi baslıǵınıń orınbasarı – mayor B.A tárepinen onıń jeke ómirine baylanıslı bolǵan sırların biletuǵınlıǵın, al, onı áshkaralamawı ushın iPhone 15 Pro Max alıp keliwin hámde alıp kelmegen jaǵdayda puqaranı juwapkershilikke tartıwın aytqan. Bunnan qorıqqan puqara MQX Qaraqalpaqstan Respublikası boyınsha basqarmasına múráját etip, járdem soraǵan. MQX Qaraqalpaqstan Respublikası Basqarması xızmetkerleri tárepinen ótkerilgen reyd dawamında Qońırat rayonı IIB baslıǵı orınbasarı talap etgen iPhone 15 Pro Maxtı alıp atırǵan waqtında jınayat ústinde qolǵa alınǵan. Waqıya boyınsha lawazımlı shaxsqa Jınayat kodeksiniń tiyisli statyaları menen jinayat isi qozǵatılıp dáslepki tergew sorastırıw jumısları alıp barılmaqta. 