Isbilermenlerdiń mashqalaları tıńlandı
Usı jıl 27-sentyabr kúni Qaraqalpaqstan Respublikası Joqarǵı Keńesiniń Baslıǵı A.Orınbaev investiciyalıq joybarlardı qollap–quwatlaw hám jańa joybarlardı iske túsiriwde ushırasıp atırǵan mashqalalardı anıqlaw boyınsha isbilermenler menen ushırastı.
Onda respublikamızdı sociallıq-ekonomikalıq jaqtan rawajlandırıw, sonıń ishinde, isbilermenlikti qollap-quwatlaw boyınsha bir qatar párman hám qararlardıń qabıl etilgenligi, usı tiykarda respublikamız isbilermenleri ushın oǵada úlken múmkinshilikler jaratılǵanlıǵı ayrıqsha atap ótildi.
Usı tiykarda mámleketlik baǵdarlamalar sheńberinde bir qatar investiciyalıq joybarlar boyınsha mánzilli dizim islep shıǵılǵan bolıp, bir qansha jańa jumıs orınlarınıń jaratılıwı rejelestirilgen. Tilekke qarsı, ayırım joybarlardıń iske túsiriliwinde bir qatar mashqalalar ushıraspaqta.
Joqarǵı Keńes Baslıǵı sáwbetlesiw barısında isbilermenlerdi qıynap kiyatırǵan mashqalalardı tıńladı hám hár bir jańa jumıs orınların jaratıw niyeti bar isbilermen qollap-quwatlanatuǵınlıǵın atap ótti. Olar tárepinen bildirilgen áhmiyetli máseleler hám mashqalalardıń orınlanıwı Joqarǵı Keńes Baslıǵınıń jeke qadaǵalawına alındı. 
Ushırasıw sońında wazıypalar belgilep alınıp, bul boyınsha tiyisli taraw basshılarına tapsırmalar berildi. Qaraqalpaqstan xabar agentligi