“Ózbekstan Respublikası Prezidenti tárepinen belgilep berilgen jańa sistema tiykarında qıytaq jer hám ijara jerlerden nátiyjeli paydalanıw arqalı xalıqtıń dáramatların arttırıw ilajları” atamasında baspasóz konferenciyası ótkerildi.
Ilajǵa Qaraqalpaqstan Respublikası Ministrler Keńesiniń Baslıǵı F.Ermanov qatnastı hám konferenciyanı basqarıp bardı. Sonday-aq, konferenciyada Ózbekstan Respublikası Bas ministriniń orınbasarı Shańaraq hám hayal-qızlar komitetiniń basshısı Z.Maxkamova, Ózbekstan Respublikası kámbaǵallıqtı qısqartıw hám bántlik ministriniń orınbasarı A.Muratov hám Oraylıq bank baslıǵınıń orınbasarı S.Melibaevlar qatnastı. Xabarıńız bar, keyingi jılları húrmetli Prezidentimizdiń qollap-quwatlawı nátiyjesinde elimizde xalıqtıń dáramatın arttırıw, olarǵa múnásip turmıs sharayatın jaratıw hám isbilermenlikti bunnan-bulayda qollap-quwatlaw nátiyjesinde, xalqımızdıń turmısqa bolǵan kózqarası shın mánisinde ózgerip, xalıqtıń dáramatları artıp, búgingi turmısınan razı bolıp jasawına sebep bolmaqta. Elimizde xalıqtıń qıytaq jerge bolǵan mádeniyatın qáliplestiriw, olardan nátiyjeli paydalanǵan halda oǵan dáramat dáregi sıpatında qaraw, hár bir qarıs jerden kóbirek dáramat alıw, suwdı únemleytuǵın texnologiyalardan nátiyjeli paydalanǵan halda mol zúráát alıw boyınsha taraw qánigeleriniń járdeminde olardı aldınǵı tájiriybeler menen tanıstırıw sonday-aq, olardıń bilim hám kónlikpelerin arttırıw, Qaraqalpaqstan Respublikası rayon (qala) sektor basshıları, hákim orınbasarları hám “máhálle jetiligi” tárepinen xalıqtıń qıytaq jer hám ijara jerlerinen nátiyjeli paydalanıw arqalı dáramatların arttırıw ilajları boyınsha belgilep berilgen jańa sistemanıń nátiyjeli engiziliwin támiyinlew, sharayatı awır jáne awır jaǵdaydaǵı 96 máhállede qıytaq jer hám ijara jerlerinen nátiyjeli paydalanıw arqalı dáramatların arttırıw ilajların úlgili ámelge asırıw, “Bir máhálle – bir ónim” principi tiykarında hár bir máhálleni anıq bir baǵdarda qánigelestiriw, sonday-aq, shańaraqlardı kooperaciya usılında biriktiriw hám jetistirilgen ónimniń oraylasqan usılda realizaciya etiliwin jolǵa qoyıw. Hár bir máhálleniń eksport potencialın arttırıw, bazarlardaǵı bahalardı azaytıw ilajların izbe-iz ámelge asırıw boyınsha baspasóz konferenciyasına qatnasıwshıları hám ǴXQ wákilleri ózlerin qızıqtırǵan sorawlarına taraw basshıları tárepinen juwaplar aldı.
