Qaraqalpaqstan Respublikasındaǵı tapsırılıwı kútilip atırǵan obektlerge press-tur shólkemlestirildi

Elimizde Jurtbasshımız tárepinen alıp barılıp atırǵan reformalar nátiyjesinde ul-qızlardı balalıqtan fizikalıq jaqtan salamat, ruwxıy bárkamal etip kamalǵa keltiriw turaqlı itibarda. Elimizdiń eń alıs, shetki aymaqlarında da mámleketlik hám mámleketlik emes mektepke shekemgi bilimlendiriw shólkemleri qurılıp, zamanagóy usılda úskenelenip atırǵanı usı iygilikli maqset jolındaǵı háreketlerden biri bolıp esaplanadı. Ellikqala rayonınıń Paxtachi, Chupan mákan puqaralar jıyınlarında jańadan qurılǵan Ózbekstan Respublikası Prezidentiniń 2021-jıl 18-sentabrdagi “Islam rawajlanıw banki hám OPEK xalıqaralıq rawajlanıw qorı qatnasıwında” Awıllıq jerlerdi turaqlı rawajlandırıw” joybarın ámelge asırıw ilajları haqqındaǵı PQ-5246-sanlı qararına tiykar jańadan qurılǵan 36-hámde 37-mámleketlik mektepke shekemgi bilimlendiriw shólkemi hám Qılshınak awıl puqaralar jıyınında “Sapargúl, Dilfuza, Shırınay” mámleketlik jeke menshik sheriklik tiykarında shólkemlestirilgen mektepke shekemgi bilimlendiriw shólkemi paydalanıwǵa tapsırıldı. Usı múnásibet penen shólkemlestirilgen ashılıw ilajlarında rayon hákimi V.B.Niyazimbetov, Qaraqalpaqstan Respublikası Joqarǵı Keńesiniń Sociallıq rawajlandırıw, jaslar siyasatı hám jámietlik birlespeler máseleleri komitetiniń baslıǵı M. U. Atamuratov, Qaraqalpaqstan Respublikası Ministrler Keńesi Baslıǵınıń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı B.P.Ótemuratov, Ózbekstan Respublikası Qarjı hám Ekonomika ministrligi janındaǵı Awıllıq jerlerdi turaqlı rawajlandırıw joybarı boyınsha direktor orınbasarı R.A.Usmanov, hákim orınbasarları, mektepke shekemgi hám mektep bilimlendiriwi bólimi juwapkerleri, nuraniylar hám keń jámiyetchilik wákilleri qatnastı.