Shomanay rayonında “Shańaraq hám hayal-qızlar orayı” ashıldı
Ózbekstan Respublikası Ministrler Kabinetiniń 2020-jıl 31-dekabrdegi 820-sanlı qararına tiykarlanıp, Shańaraq institutın rawajlandırıw, jaslardı shańaraqlıq turmısqa tayarlaw maqsetinde rayonımızdıń 3-sektor aymaǵında jaylasqan “Qarabaylı” mákan puqaralar jıyınında “Shańaraq hám hayal-qızlar orayı”nıń ashılıw máresimi bolıp ótti. Ashılıw máresiminde Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı M.Axmedova, sektor baslıqları, hákim orınbasarları A.Bekmuratov, T.Qallıqılicheva, rayonlıq Ishki isler bóliminiń hayal-qızlar máseleleri boyınsha orınbasarı, aǵa inspektor K.Bekmanova, mákeme, kárxana hám shólkemlerdiń basshıları, “Úlgili hayal-qızlar” háreketiniń aǵzaları, awıl hám mákan puqaralar jıyınındaǵı hayal-qızlar belsendileri qatnastı. Prezidentimiz tárepinen belgilep berilgen shańaraqlardaǵı tatıwlıq, tınıshlıq, awızbirshilikti saqlawday iygilikli maqsetler jolında endi ǵana ómir bosaǵasına qádem qoyıp atırǵan jaslarımızdıń usı oraylarda bilim alıwına tilekleslik bildirildi. “Shańaraq hám hayal-qızlar orayı”nıń ashılıwı rayonda shańaraqlıq qatnasıqlardı bekkemlew, jaslardı shańaraqlıq turmısqa tayarlaw, hayal-qızlardıń jámiyetlik belsendiligin arttırıwda úlken áhmiyetke iye boladı.
