Qaraqalpaqstan Respublikası Ministrler Keńesinde kiberqáwipsizlik, internettegi aldawshılıq jolı menen plastik kartalardan pul qarjıların sheship alıw jaǵdayları menen baylanıslı jınayatlardıń aldın alıw boyınsha ámelge asırılıwı tiyis jumıslar boyınsha taraw wákilleri menen keńeytilgen májilisi bolıp ótti.
Qaraqalpaqstan Respublikası Ministrler Keńesinde kiberqáwipsizlik, internettegi aldawshılıq jolı menen plastik kartalardan pul qarjıların sheship alıw jaǵdayları menen baylanıslı jınayatlardıń aldın alıw boyınsha ámelge asırılıwı tiyis jumıslar boyınsha taraw wákilleri menen keńeytilgen májilisi bolıp ótti. Májiliste Ministrler Keńesiniń Baslıǵı F.Ermanov qatnastı hám basqarıp bardı. Húrmetli Prezidentimizdiń 2021-jıl 29-noyabrdegi “Ózbekstan Respublikası jámiyetlik qáwipsizlik koncepciyasın tastıyıqlaw hám onı ámelge asırıw ilajları haqqında”ǵı PP-27-sanlı Pármanı hám 2022-jıl 3-fevraldaǵı “Internet tarmaǵında júz berip atırǵan huqıqbuzarlıqlardıń erte aldın alıwǵa baylanıslı qosımsha ilajlar haqqında”ǵı PQ-117-sanlı qararı qabıl etilgen. Usı Párman hám Qarar orınlanıwın támiyinlew maqsetinde, Ministrler Keńesiniń tiyisli qarar hám biylikleri qabıl etilip, mápdar ministrlikler, uyımlar hám shólkemlerge Internet tarmaǵında júz berip atırǵan huqıqbuzarlıqlardıń erte aldın alıw boyınsha tapsırmalar berilgen. Májiliste Qaraqalpaqstan Respublikası Prokurorı E.Tadjiev, Ishki isler ministri B.Torebekov hám kún tártibindegi máselege baylanıslı ministrlikler, uyımlar hám shólkemlerdiń basshıları hám Nókis qalası hám rayonlar studiyalarınan sektor basshıları, tiyisli uyım, shólkemlerdiń basshıları hám máhálle jetiligi wákilleri qatnastı. Qaraqalpaqstan Respublikası Ishki isler ministrligi Kiberqáwipsizlik bólimi tárepinen Internet tarmaǵında júz berip atırǵan huqıqbuzarlıqlardıń erte aldın alıw boyınsha ámelge asırılıwı tiyis jumıslar haqqında maǵlıwmat berildi. Sonıń ishinde, xalıq arasında, ministrlik, shólkem hám kárxanalarda, bilimlendiriw mákemelerinde, máhállelerde ushırasıwlar ótkerip, itibardı internettegi jalǵan siltemeler hám qosımshalarǵa qaratıw, jınayat qurbanı bolmaw jolları boyınsha jıynalǵanlarǵa túsindirip ótildi. Sonday aq jıynalǵanlarǵa jeke maǵlıwmatlardı internet tarmaǵında biytanıs shaxslarǵa beriw aqıbetinde júzege kelip atırǵan hám basqa da jınayatlardıń awır aqıbetlerinen xabardar etiwge qaratılǵan túsindiriw jumısların alıp barıw, sociallıq tarmaqlardaǵı rásmiy betlerinde járiyalanıp barılıp atırǵan xabarlardı xalıqtıń barlıq qatlamına jetkeriw boyınsha jumıslardı ámelge asırıw boyınsha májilis qatnasıwshılarına túsinik berildi. 
