Investiciya joybarları tarawdıń rawajlanıwı ushın úlken áhmiyetke iye.
Búgin Qaraqalpaqstan Respublikası Ministrler Keńesinde Ózbekstan Respublikası Awıl xojalıǵı ministri Ibrohim Abdurahmonov hámde Ministrler Keńesiniń Baslıǵı Farhod Ermanov penen birgelikte, Rossiya Federaciyasınan kelgen kompaniya wákilleri menen ushırastı. Ushrasıw dawamında eki tárepleme birge islesiw baylanısların ornatıw, Qaraqalpaqstan Respublikası rayonlarında jańa hám perspektivalı joybarlardı ámelge asırıw, atap aytqanda, Ámiwdárya rayonında kartoshka jetistiriw, miywe jetistiriwge qánigelesken baǵ jaratıw hám de olardı qayta islew hám eksportqa baǵdarlaw máseleleri dodalandı. Awıl xojalıǵı ministri Ibrohim Abdurahmonov hám de Qaraqalpaqstan Respublikası Ministrler Keńesiniń Baslıǵı Farhod Ermanov, Rossiya kompaniyası wákillerinen investiciyalıq joybarlardı ámelge asırıw boyınsha usınıslardı tıńladı. Ushırasıw dawamında kompaniya wákilleri Shomanay rayonında miywe-palız jetistiriwge qánigelesken klaster shólkemlestiriw hámde Taxtakópir rayonında sharwashılıq kompleksin jaratıw boyınsha da usınıslar bildirildi. Nókis rayonında zamanagóy qusshılıq kompleksi, Qanlıkól rayonında bolsa texnikalıq kannabis ósimligin jetistiriw, Kegeyli rayonında investiciyalıq joybar sheńberinde kartoshka hám boyan ósimliklerin jetistiriw, sonday-aq, usı rayonda pyure hám miywe-palız sherbetin islep shıǵarıw joybarları da tanıstırıldı. Sóylesiw dawamında Farhod Ermanov kompaniya wákillerine Bozataw hám Taxtakópir rayonlarındaǵı sharwashılıq komplekslerine barıwdı usınıs etti. Óz gezeginde, Awıl xojalıǵı ministri Ibrohim Abdurahmonov búgingi kúnde awıl xojalıǵında ónim islep shıǵarıw, onı qayta islew hám basqa da tarmaqlardaǵı joybarlardıń perspektivalı bolıwı, hár bir qádem anıq esap-sanaqlarǵa tiykarlanıwı hám aymaqtıń ıqlım sharayatlarına sáykes alıp barılıwı zárúr ekenligin atap ótti. Ol Qaraqalpaqstan sharayatında investiciyalıq joybarlardı ámelge asırıw hám jańa quwatlıqlardı iske qosıw perspektivalı ekenin ayttı. Ushırasıw juwmaǵında rossiyalı investorlar Ózbekstan menen perspektivalı birge islesiw baylanısları ornatılǵanın, jańa joybarlardı ámeliyatqa engiziw bolsa bul birge islesiwdi jáne de bekkemlewge tiykar jaratatuǵının atap ótti. 
