Ministrler Keńesiniń Baslıǵı F.Ermanov hámde Joqarǵı Keńestiń Sanaat, qurılıs, transport hám málimleme texnologiyaları máseleleri komiteti baslıǵı I.Sdikov basshılıǵında respublikamızdaǵı qurılısqa baylanıslı máseleler hár tárepleme ko’rip shıǵıldı.

Májiliste barlıq rayonlardıń qurılıs boyınsha hákim orınbasarları, mámleketlik shólkemlerdiń wákilleri, iri qurılısshılar, qánigeler hám investorlar qatnastı. Ótkerilgen májilis dawamında qurılıs tarawındaǵı áhmiyetli mashqalalardı anıqlaw hám olarǵa sheshim tabıw, innovaciyalıq sheshimler hám jańa texnologiyalardı engizgen halda zamanagóy kóp qabatlı turaq jay massivlerin qurıw hám sapa jaǵınan ayrıqsha itibar qaratqan halda óz waqtında tapsırıw máseleleri dodalandı. Sonday-aq, joybarlardı qarjılandırıw, ashıq-aydınlıqtı arttırıw hám qáwipsizlik standartlarına ámel etiw baǵdarındaǵı máseleler taraw wákilleri menen hár tárepleme dodalandı. Bolıp ótken májilis dawamında qurılıs tarawın rawajlandırıw ushın bir qatar usınıslar kórip shıǵıldı. Sonıń ishinde, zamanagóy qurılıs materiallarınan nátiyjeli paydalanıw, ekologiyaǵa zıyan keltirmeytuǵın texnologiyalardı qollanıw hám miynet resursların aqılǵa uǵras basqarıw haqqındaǵı usınıslar kórip shıǵıldı.