Qaraqalpaqstan Respublikası Ministrler Keńesiniń Baslıǵı F.Ermanov Franciya Rawajlanıw agentliginiń jetekshi qánigesi Paskal Duard basshılıǵındaǵı ekspertler toparı menen ushırasıw ótkerdi.

Ózbekstan Respublikası Prezidentiniń 2022-jıl 24-dekabrdegi PQ-459-sanlı qararına muwapıq, “Aral teńizi basseyniniń tómengi aǵısındaǵı degradaciyaǵa ushıraǵan jerlerdiń jaǵdayın jaqsılaw” joybarı ámelge asırılmaqta. Usı jıldıń yanvar ayında usı joybardıń 2-basqıshı jumısı baslandı, bul basqıshtı ámelge asırıwshı Franciya Rawajlanıw Agentligi (AFD) hám Evropa investiciyalıq banki (EIB) tárepinen qarjılay qollap-quwatlanıp, tender tiykarında tańlap alınǵan ONFI hám Rahmanov Partners JShJ tárepinen ámelge asırılmaqta. Usı joybar sheńberinde Franciya Rawajlanıw agentliginiń jetekshi qánigesi Paskal Duard basshılıǵındaǵı ekspertler toparı Qaraqalpaqstan Respublikası Ministrler Keńesiniń Baslıǵı F.Ermanov penen ushırastı. Ushırasıw dawamında óz-ara áhmiyetli joybarlardı ámelge asırıwda “Jasıl” ekonomika – ekologiyalıq taza hám turaqlı rawajlanıw modellerin engiziw, awıl xojalıǵı tarawında zamanagóy texnologiyalar tiykarında agrar tarawdı modernizaciyalaw máselelerine toqtalıp ótildi. Sonday-aq, sapar sheńberinde Qaraqalpaqstan Respublikasınıń 8 rayonında joybardıń Texnikalıq-ekonomikalıq máseleleri boyınsha aymaqlarda ushırasıwlar ótkeriw rejelestirilgen.