Ashıq-aydınlıq – korrupciyanıń aldın aladı
Qaraqalpaqstan Respublikası Ministrler Keńesinde 9-dekabr – Xalıqaralıq korrupciyaǵa qarsı gúresiw kúni múnásibeti menen ministrlikler menen shólkemlerde ashıq-aydınlıqtı támiyinlew, korrupciyalıq qáwip-qáterlerdiń aldın alıw hám saplastırıw, tarawda zamanagóy korrupciyaǵa qarsı gúresiw sistemasın engiziw máselelerine baǵıshlanǵan “Ashıq esikler kúni” ilajı ótkerildi. Ilajǵa tiyisli ministrlikler menen shólkemlerdiń, joqarı oqıw orınlarınıń juwapker xızmetkerleri, málimleme xızmetleriniń basshıları, korrupciyaǵa qarsı ishki qadaǵalaw bólimi xızmetkerleri qatnastı. Qaraqalpaqstan Respublikası Ministrler Keńesiniń Korrupciyaǵa qarsı ishki qadaǵalaw bóliminiń baslıǵı B.Matmuratov hám basqalar shıǵıp sóylep, elimizde korrupciyaǵa qarsı gúresiw baǵdarında ámelge asırılıp atırǵan ilajlarǵa keńnen toqtap ótti. Atap ótilgenindey, mámleketimizde mámleketlik uyımlar hám shólkemler, sonday-aq, jergilikli atqarıw hákimiyatı uyımlarında korrupciyaǵa qarsı gúresiw, onı keltirip shıǵarıp atırǵan sebepler hám sharayatlardı anıqlaw hám saplastırıw baǵdarında sistemalı jumıslar ámelge asırılmaqta. Búgingi kúnde Prezidentimiz tárepinen korrupciyaǵa qarsı gúresiw baǵdarında alıp barılıp atırǵan kúshli siyasat nátiyjesinde mámleketimizde sońǵı jıllarda korrupciyaǵa qarsı gúresiw boyınsha 10 nan aslam normativlik-huqıqıy hújjetler qabıl etildi. Prezidentimizdiń 2021-jıl 6-iyuldaǵı “Korrupciyaǵa qarsı mawasasız qatnasta bolıw ortalıǵın jaratıw, mámleketlik hám jámiyetlik basqarıwda korrupciyalıq faktorlardı keskin azaytıw hám onda jámiyetshiliktiń qatnasın keńeytiw ilajları haqqında”ǵı pármanı hám “Korrupciyaǵa qarsı gúresiw jumısın nátiyjeli shólkemlestiriwge baylanıslı qosımsha ilajlar haqqında”ǵı qararına hám Joqarǵı Keńestiń Prezidium qararına muwapıq Ministrler Keńesi basqarıw apparatı strukturasında Korrupciyaǵa qarsı ishki qadaǵalaw bólimi shólkemlestirildi. – Usı ishki qadaǵalaw bólimi tárepinen xalıqaralıq standartlar tiykarında korrupciyaǵa qarsı menedjment sisteması engizilip, korrupciyaǵa qarsı gúresiw boyınsha ishki hújjetleri islep shıǵılıp, Ministrler Keńesiniń arnawlı qararı menen Ministrler Keńesiniń korrupciyaǵa qarsı gúresiw boyınsha Siyasatı, korrupciyalıq qáwip-qáterlerdi bahalaw Metodologiyası, máplerdiń soqlıǵısıwın basqarıw boyınsha Rejesi, baylanıs kanalları arqalı korrupciyalıq háreketler haqqında kelip túsken xabarlardı qabıllaw hám qarap shıǵıw Reglamenti, xızmetkerlerdiń etika hám korrupciyaǵa qarsı gúresiw tarawında oqıtılıwın shólkemlestiriw boyınsha hám basqa da qollanbalar hám rejeler tastıyıqlandı,-deydi Ministrler Keńesiniń Korrupciyaǵa qarsı ishki qadaǵalaw bólimi bas qánigesi Q.Ótemuratov. Xalıqtıń huqıqıy sanasın hám huqıqıy mádeniyatın arttırıwǵa, jámiyette korrupciyaǵa qarata mawasasız qatnastı qáliplestiriwge baylanıslı ilajlar belgilenip, barlıq qala hám rayonlar oraylarındaǵı LED ekranlarda video rolikler, bilbordlarda korrupciyaǵa qarsı mawasasız qatnastı qáliplestiriwshi úgit-násiyatlaw materialları berip barılmaqta. Jıl dawamında qala hám rayonlar hákimlikleri xızmetkerleri menen onlayn hám oflayn formada ushırasıwlar ótkerilip kelinbekte. Atap ótiw kerek, Prezidentimizdiń 2021-jıl 16-iyundaǵı “Mámleketlik uyımlar hám shólkem jumıslarınıń ashıq-aydınlıǵın támiyinlew, sonday-aq, jámiyetlik qadaǵalawdı nátiyjeli ámelge asırıwǵa baylanıslı qosımsha ilajlar haqqında”ǵı pármanı menen rásmiy veb-saytlarǵa jaylastırılıwı tiyis bolǵan 35 bántli ashıq maǵlıwmatlar dizimi tastıyıqlandı. Al, 2023-jıl 27-noyabrdegi “Korrupciyaǵa qarsı gúresiw sistemasın bunnan bılay da jetilistiriw hám mámleketlik uyımlar menen shólkemlerdiń jumısı ústinen jámiyetlik qadaǵalaw sistemasınıń nátiyjeliligin arttırıw ilajları haqqında”ǵı pármanı menen oǵan jáne 5 bánt qosıldı. 2021-jıl 15-iyun kúngi “Sanlı ekonomika hám elektron húkimettiń rawajlanıw jaǵdayın reyting bahalaw sistemasın bunnan bılay da jetilistiriw ilajları haqqında”ǵı qararda mámleketlik uyımlar, xojalıq birlespeleri hám jergilikli atqarıw hákimiyatı uyımlarınıń rásmiy veb-saytında jaylastırıw ushın májbúriy bolǵan málimlemelerdiń dizimi tastıyıqlanǵan. Ilajda usı máseleler boyınsha ámelge asırılıp atırǵan jumıslar tuwralı da maǵlıwmatlar berilip, pikir-usınıslar bildirildi. Qatnasıwshılar ózlerin qızıqtırǵan sorawlarǵa juwap aldı.
