Qaraqalpaqstan Respublikası Ministrler Keńesiniń Baslıǵı F.Ermanov Qıtay mámleketiniń “Overseas of Sanmenxia Road and Bridge construction group” kompaniyasınıń wákilleri menen ushırastı.

Búgin Qaraqalpaqstan Respublikası Ministrler Keńesi Baslıǵı F.Ermanov Qıtay Xalıq Respublikasınıń “Overseas of Sanmenxia Road and Bridge construction group” kompaniyasi wákillerin qabılladı. Bul kompaniya Qaraqalpaqstan Respublikasınıń Nókis qalasında iri úy-jay kompleksin qurıwdı rejelestirmekte. Búgingi kúnde aymaqta kompleks qurılıwı joybarın islep shıǵıw boyınsha qıtaylı qánigeler tárepinen úyreniw jumısları alıp barılmaqta. Ushırasıwda “Overseas of Sanmenxia Road and Bridge construction group” kompaniyasi wákilleri qurılıs joybarların ámelge asırıwda itibar beriliwi kerek bolǵan máseleler boyınsha óz usınısların bildirdi. Sonnan, qurılıs procesinde sapa, texnika hám miynet qáwipsizligine ámel etiw, energonátiyjelilik joybarların ámelge asırıw boyınsha Ózbekstandaǵı talaplar hám tájiriybe boyınsha pikir almasıldı. Kompaniya wákilleri usı joybardı islep shıǵıwda jasıl aymaqqa úlken itibar berilip atırǵanlıǵın ayrıqsha atap ótti.