Qaraqalpaqstan Respublikası Ministrler Keńesiniń Baslıǵı F.Ermanov Turkiyanıń “SAGLIK GROUP” JShJ konsalting kompaniyası wákilleri menen ushırastı.

Ózbekstan Respublikası Prezidentiniń “Densawlıqtı saqlaw tarawında reformalardı tereńlestiriw boyınsha qosımsha is-ilajlar haqqında” 2024-jıl 22-yanvardaǵı PQ-38-sanlı qararına muwapıq, sonday-aq, densawlıqtı saqlaw sistemasında ámelge asırılıp atırǵan reformalardı tereńlestiriw, jetekshi sırt el ekspertler qatnasıwında xalıqqa kórsetilip atırǵan medicinalıq xızmetler sapasın xalıqaralıq standartlar dárejesine alıp shıǵıw, taraw nátiyjeliligin hám ashıqlıqtı támiyinlew maqsetinde Turkiyanıń “SAGLIK GROUP” JShJ konsalting kompaniyasınan bir topar qánigeler elimizge keldi.   Xızmet saparı basında Turkiyanıń “SAGLIK GROUP” JShJ konsalting kompaniyası wákilleri Qaraqalpaqstan Respublikası Ministrler Keńesiniń Baslıǵı F.Ermanov qabıllawında boldı.   Sáwbetlesiw dawamında densawlıqtı saqlaw sistemasında ámelge asırılıp atırǵan reformalardı elede jedellestiriw maqsetinde xalıqqa kórsetilip atırǵan medicinalıq xızmetler sapasın xalıqaralıq standartlar dárejesine alıp shıǵıwda ámelge asırılıwı lazım máseleler dodalandı.   Bunnan soń isshi topar U.Xalmuratov atındaǵı Qaraqalpaqstan Respublikası kóp tarmaqlı medicina orayı, Xojeli, Kegeyli, Taqıyatas, Ámiwdarya, Nókis rayonlarındaǵı medicina birlespelerinde bolıp, birlemshi sistemadaǵı bar bolǵan mashqalalar, mámleket medicinalıq qamsızlandırıw sistemasın engiziwge tayarlıq jaǵdayın úyrendi. Tiykarınan, medicinalıq ásbap-úskeneler hám qurallar menen támiyinlengenligi, kepillengen paketke kiritilgen medicinalıq xızmetlerdi qarjılandırıw mexanizmlerin monitoring etildi.