Usı jıldıń 21-24-noyabr kúnleri Prezident janındaǵı Sociallıq qorǵaw milliy agentligi tárepinen Qaraqalpaqstan Respublikasında sociallıq qorǵaw tarawında ámelge asırılıp atırǵan jumıslar boyınsha úyreniwler alıp barılǵan edi.

Búgin Qaraqalpaqstan Respublikası Ministrler Keńesinde ótkerilgen májiliste usı úyreniwler nátiyjesi qarap shıǵıldı. Májiliste Prezident pármanı menen qabıl etilgen “Kámbaǵallıqtan abadanlıqqa qaray” baǵdarlamasında sociallıq xızmetlerdiń kólemin keńeytiw, sonday-aq, mayıplıǵı bolǵan shaxslardı sociallastırıw, jetimliktiń aldın alıw, jetim hám ata-ana qaramaǵınan ayırılǵan balalarǵa individual qatnas tiykarında shańaraqqa jaqın ortalıqta ǵamqorlıq kórsetiw hám tárbiyalaw wazıypalarınıń áhmiyetli ekenligi atap ótildi. Atap ótilgen baǵdarlar boyınsha jumıslardı ele de jetilistiriw, jıldıń aqırına shekem belgilep berilgen reje hám wazıypalardıń tolıq orınlanıwın támiyinlew boyınsha juwapkerlerge tapsırmalar berildi. Májiliste barlıq rayon (qala) studiyalarınan tiyisli juwapkerler qatnastı.