QMUda “Akademik hám jaslar: ilimniń rawajlanıwın jaslar jaratadı!” atamasındaǵı akademikler hám jaslar kongressi bolıp ótti
Búgin 7-noyabr kúni Berdaq atındaǵı Qaraqalpaq mámleketlik universitetinde Akademik Behzod Sodiqovich Yuldashevtiń esteligine baǵıshlanǵan “Akademik hám jaslar: ilimniń rawajlanıwın jaslar jaratadı!” atamasındaǵı akademikler hám jaslar kongressi bolıp ótti. Onda Ózbekstan Respublikası Ilimler akademiyasınıń akademikleri, Qaraqalpaqstan Respublikası hám Xorezm wálayatı joqarı oqıw orınları basshıları, doktorantları, izleniwshileri, jas ilimpazlar, qábiletli studentler hám magistrantlar qatnastı.
Kongresste ÓzR IA vice-prezidenti professor S.Mirzaev, Qaraqalpaqstan Respublikası Joqarǵı Keńesiniń komitet baslıǵı A.Atajanov, Joqarı bilimlendiriw, ilim hám innovaciyalar ministriniń orınbasarı O.Maxkamov, Qaraqalpaqstan Respublikası Joqarı bilimlendiriw, ilim hám innovaciyalar ministri B.Qayıpbergenovlar miymanda boldı. Dáslep miymanlar jas alımlar tárepinen tayarlanǵan innovaciyalıq kórgizbeler menen tanıstı.
Bunnan soń, “Akademik hám jaslar: ilimniń rawajlanıwın jaslar jaratadı!” atamasındaǵı akademikler hám jaslar kongressiniń ashılıw máresimi bolıp ótti. Kongressti Berdaq atındaǵı Qaraqalpaq mámleketlik universiteti rektorı, Ózbekstan Respublikası Ilimler Akademiyası Qaraqalpaqstan bólimi baslıǵı A.Reymov ashıp berdi hám basqarıp bardı. Ol óz shıǵıp sóylewinde Húrmetli Prezidentimizdiń baslaması menen ilimge qaratılıp atırǵan itibar, ilim tarawın rawajlandırıw, izertlewlerdiń nátiyjeliligin arttırıw hám jas ilimpazlardı qollap-quwatlaw baǵdarında úlken jumıslar alıp barılıp atırǵanlıǵın aytıp ótti.
Kongress dawamında akademikler ózleriniń ómir jolları, ilim tarawındaǵı jetiskenlikleri hám alıp barıp atırǵan ilimiy jumısları haqqında jaslarǵa keńnen maǵlıwmat berdi. Sonıń menen birge, akademikler óz ilimiy jumıslarınıń áhmiyetli basqıshları, ushırasıp atırǵan qıyınshılıqları hám olardı jeńip ótiwde qolǵa kirgizgen tájiriybelerin jaslar menen bólisti. Sonday-aq, kongresste ilim tarawındaǵı áhmiyetli mashqalalar, ilimiy izertlewlerde jańa texnologiyalardıń áhmiyeti, jáhán kólemindegi ilimiy jetiskenlikler haqqında da sóz etildi.
Ilaj sheńberinde universitettiń talantlı student-jasları tárepinen tayarlanǵan koncert baǵdarlaması jıynalǵanlar názerine usınıldı. Sonday-aq kongress dawamında “Jasıl mákan” ulıwma milliy joybarı ótkerilip, bul jerde Akademikler baǵı jaratıldı. Akademikler baǵına jaqsı niyetler menen terek nálleri otırǵızıldı.
Ilajdıń tiykarǵı maqseti – jaslardı ilim hám innovaciyaǵa tartıw, olarda ilimiy qızıǵıwshılıqtı arttırıw hám mámlekettiń keleshegi ushın zárúr bolǵan jetik ilimpazlardı jetistiriwden ibarat. Bul ilaj jaslar ushın ilim dúnyasına jol kórsetiw, olardı ilimiy izleniwlerge baǵdarlaw hám ózleri tańlaǵan jolda isenimli qádem taslawlarına járdem beriwge qaratılǵan bolıp tabıladı.