Qaraqalpaqstan Respublikası Nókis qalası “Eli abad” MPJ aymaǵındaǵı kóp qabatlı turaq jaylar aldında puqaralardıń záhárli gazden zıyanlanıwınıń aldın alıw, ayrıqsha jaǵdaylar hám órt qáwipsizligin támiyinlew maqsetinde juwapker xızmetler, keń jámiyetshilik wákiller, puqaralar, ǵalaba xabar quralları hám blogerler qatnasında kórgizbeli seminar tárizinde baspasóz konferenciyası ótkerildi.

Dáslep, jıynalǵanlarǵa záhárli gazden zıyanlanıwdıń aldın alıwda qáwipsizlik qaǵıydaları keń túrde kórgızbeli qurallar menen túsindirildi. Sonday-aq, jıynalǵan puqaralarǵa esletpe materiallarıda tarqatıldı. Jıynalǵan puqaralardıń sorawlarına juwaplar berildi. Kórgizbeli seminardan keyin, sol orında dala sharayatında tigilgen shatırda juwapker basshılar hámde ǵalaba xabar quralları wákilleri qatnasında baspasóz konferenciyası ótkerildi. Konferensiyada dáslep, Qaraqalpaqstan Respublikası Ayrıqsha jaǵdaylar basqarması baslıǵı Azamat Davletov tárepinen záhárli gazden zıyanlanıw menen baylanıslı bolǵan kewilsiz hádiyseler hám olardıń kelip shıǵıw sebepleri túsindirildi. Qáwipsizlik qaǵıydaları boyınsha arnawlı video rolik qoyıp berildi. Bunnan soń, konferenciyanıń soraw-juwap basqıshı bolıp ótti. Ǵalaba xabar qural wákilleri tárepinen juwapker basshılarǵa qızıqtırǵan sorawlar hámde usınısların bildirip, tiyisli juwaplar aldı.