Ózbekstan – Qazaqstan aymaqlar aralıq birge islesiw forumı
Samarqand qalasında 22-oktyabr kúni Ózbekstan-Qazaqstan tórtinshi aymaqlar aralıq birge islesiw forumı bolıp ótti. Ózbekstan Respublikası Bas ministri Abdulla Aripov hám Qazaqstan Respublikası Bas ministri Oljas Bektenovtıń basshılıǵında ótken forumda eki mámlekettiń barlıq aymaqlarınıń wákilleri hám onıń sheńberinde 200 ge shamalas isbilermen ushırasıwı bolıp ótti. Aymaqlardıń basshıları hám isbilermenleri arasında tikkeley baylanıslardı rawajlandırıwǵa qolaylı sharayat jaratıw hám olardı hár tárepleme qollap-quwatlaw maqsetinde ótkerilgen forumda sońǵı jılları mámleketlerimiz arasındaǵı kóp ásirlik doslıq, jaqsı qońsıshılıq hám óz-ara húrmet principlerine tiykarlanǵan strategiyalıq sheriklik hám awqamlaslıq qatnasıqları jedel rawajlanıp, mámleketlerimizdiń barlıq tarawlarda unamlı ósiwi baqlanıp atırǵanı atap ótildi. Óz-ara qatnasıqlar bunday joqarı dárejege kóteriliwinde, mámleketlerimiz basshıları arasındaǵı doslıq hám isenimli baylanıslar áhmiyetli faktor bolıp atırǵanı ayrıqsha atap ótildi. Keyingi 7 jıl ishinde Ózbekstan hám Qazaqstan arasındaǵı óz-ara sawda aylanısı derlik 2,5 esege ósip, ótken jılı 4,4 milliard dollardı quradı. Búgingi kúnde Ózbekstanda Qazaqstan kapitalınıń qatnasıwında mıńnan aslam kárxana, Qazaqstanda bolsa – 3600 den aslam Ózbekstan kapitalınıń qatnasıwında kárxanalar óz jumısın alıp barmaqta. Forumda bar rezervlerden nátiyjeli paydalanǵan halda, jaqın jıllarda óz-ara sawda kólemin 10 milliard dollarǵa jetkeriw ilajları boyınsha hár tárepleme pikir alısıldı. Atap ótilgenindey, onda aymaqlar aralıq birge islesiwdi rawajlandırıw úlken áhmiyetke iye. Ózbekstan hám Qazaqstan arasındaǵı uzaq múddetli sheriklikti keńeytiwde aymaqlar aralıq baylanıslar haqıyqıy háreketlendiriwshi kúsh bolıp xızmet etpekte. Atap aytqanda, shegaralas aymaqlar Qaraqalpaqstan Respublikası Manǵıstaw wálayatı menen, Tashkent wálayatı Túrkstan wálayatı menen, Nawayı wálayatı Qızılorda wálayatı menen tikkeley hám tıǵız baylanıslar ornatqan. Shegaralas bolmaǵan aymaqlarımız da óz-ara baylanıslardı bekkemlep, sawda-satıq hám sanaat kooperaciyası baylanısların izbe-iz rawajlandırıp kelmekte. Forumda aymaqlar arasında ele iske qosılmaǵan úlken potencial bar ekeni, qalaberse, tikkeley baylanıslardı rawajlandırıwǵa, óz-ara paydalı joybarlardı ámelge asırıwǵa da qızıǵıwshılıq júdá joqarı ekeni atap ótildi. Sonday-aq, tuwısqan xalıqlar arasında mádeniy-gumanitarlıq baylanıslardı rawajlandırıw da úlken áhmiyetke iye ekeni ayrıqsha atap ótildi. Ózbekstan-Qazaqstan tórtinshi aymaqlar aralıq forumınıń juwmaqları boyınsha bir qatar hújjetlerge qol qoyıldı.
