Qaraqalpaqstan Respublikası Ministrler Keńesiniń Baslıǵı F.Ermanov Qıtay Xalıq Respublikasınıń “Xinjiang Hongtai Seed Industry Technology Co., Ltd” kompaniyası wákilleri menen ushırasıw ótkerdi.

Ushırasıwda eki tárepleme awıl xojalıǵı tarawında birge islesiw baylanısların jáne de keńeytiw boyınsha sóylesiwler alıp barıldı. Azıq-awqat ónimlerin jetistiriw hám onıń sapasına ayrıqsha itibar qaratıw boyınsha sońǵı jıllarda Prezidentimiz tárepinen kóplegen Párman hám qararlar qabıl etilip, bunıń nátiyjesinde orınlarda úlken jetiskenliklerge erisildi. Agrar tarmaqta da óndiris kólemi eki esege arttı. Elimizde azıq-awqat qáwipsizligin támiyinlew hám onıń sapasın arttırıwda Qıtay Xalıq Respublikasınıń agrar tarawdaǵı qánigeleri menen birgelikte jumıslardı alıp barıw boyınsha turaqlı jumıslar dawam ettirilmekte. Qıtay kompaniyası elimizde mazalı (Bolgar) burıshı, másh, sapalı hám zúráátli paxta jetistiriw hám onı qayta islew, awıl xojalıǵı baǵdarında birgeliktegi joybarlardı ámelge asırıw boyınsha óz usınısların bildirdi. Ushırasıw juwmaǵında Ministrler Keńesiniń Baslıǵı F.Ermanov “Xinjiang Hongtai Seed Industry Technology Co., Ltd” kompaniyası menen bul baǵdarda birge islesiwde bárqulla tayar ekenin málim etti.