Qaraqalpaqstan Respublikası Ministrler Keńesiniń Baslıǵı F.Ermanovtıń náwbettegi kóshpeli qabıllawı Ámiwdárya rayonı “Qilichboy” APJda bolıp ótti.

Kóshpeli qabıllaw – puqaralar menen sáwbetlesiw, olardıń turmıslıq mútájliklerin úyreniw, mashqalalarına unamlı sheshim tabıwda áhmiyetli orın bolıp esaplanadı. Sol sebepli Ministrler Keńesiniń Baslıǵı tárepinen orınlarda kóshpeli qabıllawlar shólkemlestirilip, bar mashqalalardı anıqlaw hám olardı ornında saplastırıw boyınsha sistemalı jumıslar alıp barılmaqta. Náwbettegi kóshpeli qabıllaw Ámiwdárya rayonında bolıp ótti. Qabıllawda tiykarınan puqaralardı qıynap kiyatırǵan mashqalalar qatarında, sociallıq qollap-quwatlaw, bántlik, medicinalıq járdem, isbilermenlik iskerliginde ushırasıp atırǵan mashqalalar boyınsha múrájatlar bildirildi. Bildirilgen basım kópshilik múrajatlar ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Ministrler Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Elimizde «Insan qádiri ushın» principi tiykarında ótkerilip atırǵan bunday kóshpeli qabıllawlar puqaralar turmısında ushırasıp atırǵan hám olardı qıynap kiyatırǵan mashqalalarǵa sheshim tabıwda sonıń menen birge xalqımızdı búgingi kúninen kewilli jasawı jolında jáne bir ámeliy jumıslardıń dáliyli boladı.