Prezident Shavkat Mirziyoyevtiń basshılıǵında qurılıs industriyası hám qurılıs materialların islep shıǵarıwdı jáne de rawajlandırıw ilajları boyınsha videoselektor májilisi bolıp ótti.

Kún tártibindegi tiykarǵı máselelerge ótiwden aldın mámleketimiz basshısı kámbaǵallıqtı qısqartıw hám xalıqtıń turmıs abadanlıǵın arttırıw máselelerine toqtap ótti. Prezident kúni keshe qol qoyılǵan 2 áhmiyetli hújjetke muwapıq, usı jıldıń ózinde 500 mıń, kelesi jılı jáne 1 million adamdı kámbaǵallıqtan shıǵarıwǵa qaratılǵan «Kámbaǵallıqtan abadanlıqqa qaray» baǵdarlaması baslanbaqta. Sırtqı miynet migraciyası agentligi Húkimet boysınıwına ótkeriledi hám Behzod Musaev oǵan basshı etip tayınlanadı. Agentlikke puqaralarımızdıń sırt eldegi joqarı dáramatlı miynet bazarlarına kiriwi boyınsha baslanǵan jumıslardı jedellestiriw tapsırıldı. Hákimler hám sırt eldegi diplomatiyalıq wákilxanalar sırt elde miynet etip atırǵan watanlaslarımızdıń táǵdiri ushın agentlik penen teńdey juwapker bolatuǵını belgilendi. Baǵ jarataman, degen isbilermenge jerdi arzan krediti hám tayar joybarı menen birge beretuǵın sistema boladı Awıl xojalıǵı ministrligi hám hákimliklerge jáne qosımsha 50 mıń gektar jer tabıw, solardıń negizinde 200 mıń shańaraqtı dáramatlı etip, kámbaǵallıqtan shıǵarıw boyınsha esap-sanaqlardı ámelge asırıw tapsırıldı. Májiliste ekonomikanıń barlıq tarmaqlarınıń rawajlanıwına úlken impuls beretuǵın tarawlardan biri – qurılıs ekeni atap ótildi. Máselen, Ózbekstanda jılına 150 trillion somlıq qurılıslar bolmaqta. Bul qarjılardıń úshten birin qurılıs materialları quraydı. Qárejetlerdiń qalǵan bólegi elektrotexnika, mashina qurılısı, toqımashılıq, ximiya, metalldı qayta islew sanaatları, qurılıs texnikaları, qurıw-pardozlaw, joybarlaw hám dizayner xızmetlerine tuwra keledi. Ápiwayı etip aytqanda, qurılıs – mıńlaǵan ápiwayı jumısshılardı bánt etiwden baslap, joybarlawshı, arxitektor, dizayner, injener-texnolog sıyaqlı joqarı miynet haqı alatuǵın kreativ sanaat qánigelerine talaptı qáliplestiretuǵın taraw. Sońǵı jeti jılda qurılıs tarawında 5 mıńǵa shamalas jańa kárxana iske qosıldı, 94 mıń turaqlı jumıs ornı jaratıldı Óndiris  2 esege ósti, jıllıq aylanısı 100 milliard sumnan artqan kárxanalar 150 den arttı. Sońǵı bes jılda qurılıslar kólemi 2 esege kóbeydi. Sonıń menen birge, 650 million dollarlıq jańa ónimlerdi ózlestiriw esabınan qurılıstaǵı importtıń úlesin 31 procentten 25 procentke túsiriwge erisildi. Qurılıs materiallarınıń eksport bazarı da 58 ge jetti, sırt elde 20 dan aslam sawda qoymaxanaları, 50 den aslam sawda dúkanları ashıldı. Lekin, potencialı, ónimine bazarda talabı joqarı bolǵan bul taraw ushın bunday kórsetkishler az ekenligi kórsetip ótildi. Tek ǵana qońsılarımızdıń ózi bizde islep shıǵarıw jolǵa qoyılǵan 2 milliard dollarlıq qurılıs materialların basqa mámleketlerden import etpekte. Bizde házirge shekem lak-boyaw, gúlqaǵaz, PXVdan truba hám fitingler, pol qaplaması, pardozǵa qolaylı tas, santexnika sıyaqlı islep shıǵarıw jolǵa qoyılǵan tovarlar import etilmekte.