Ministrler Keńesiniń Baslıǵı F.Ermanovtıń Qońirat rayonı “Ájiniyaz”APJ puqaraları ushın náwbettegi kóshpeli qabıllawı bolıp ótti

Húrmetli Prezidentimizdiń baslaması hám basshılıǵında ámelge asırılıp atırǵan reformalardıń turmısta óz sáwlesin tabıwı hám puqaralarımızdıń búgingi turmısınan razı bolıp jasawın támiyinlew maqsetinde olardıń mashqalaların sheshiw boyınsha ilajlar dawam etpekte. Sol maqsette usı jıldıń 20-sentyabr kúni Qońırat rayonındaǵı “Ájiniyaz” APJ da Qaraqalpaqstan Respublikası Ministrler Keńesiniń Baslıǵı F.Ermanovtıń náwbettegi kóshpeli qabıllawı bolıp ótti. Búgingi kúnde elimizde «Insan qádiri ushın» principi tiykarında puqaralardıń mashqalalarına sheshim tabıw, olardıń turmıs abadanlıǵın, eń baslısı, búgingi turmısınan razılıǵın támiyinlew baǵdarında barlıq ilajlar kórilmekte. Búgingi kóshpeli qabıllawda puqaralar tárepinen tiykarınan medicinalıq járdemler kórsetiw, operaciya tólemlerin tólep beriw, sociallıq qollap-quwatlaw, bilimlendiriw, jumıssız puqaralardıń bántligin támiyinlew hám basqa da bir qatar máseleler boyınsha múrájatlar bildirildi. Puqaralar tárepinen bildirilgen múrájatlardıń basım kópshiligi ornında unamlı sheshimin taptı, waqıt talap etiletuǵın múrájatlar Ministrler Keńesiniń Baslıǵı F.Ermanovtıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi.