Xorezm wálayatı hám Shomanay rayonınıń doslıq qatnasıqları dawam etpekte

Aralboyın birgelikte rawajlandırıw maqsetinde Qaraqalpaqstan Respublikası rayonları Ózbekstan Respublikasındaǵı wálayatlarǵa biriktirilgen bolıp, sonnan Xorezm wálayatı Shomanay rayonına biriktirilgen edi. Sol múnásibet penen Xorezm wálayatı hákimi J.Raximov hám de  bárshe qala hám rayonları hákimleri Shomanay rayonında boldı. Miymanlardı Qaraqalpaqstan Respublikası Ministrler Keńesiniń baslıǵı F.Ermanov hám Shomanay rayonı hákimi A.Ametovler kútip aldı. Soń rayon hákimligi májilisler zalında Xorezm wálayatı hákimi J.Raximov hám Shomanay rayonı hákimi A.Ametov, sektor baslıqları, hákim orınbasarları hám jaslar jetekshileri qatnasında májilis bolıp ótti. Májiliste jumıssızlıqtıń aldın alıw maqsetinde rayondaǵı mákan hám awıl puqaralar jıyınları potencialınan kelip shıqqan halda joybar islep shıǵıw kerekligin hám kishi investiciya joybarların kóbeytiw  boyınsha  Xorezm wálayatı qala hám  rayon hákimlerine tapsırmalar berildi. Bunnan soń, Xorezm wálayatınıń 13 qala hám rayonları rayonımızdaǵı 13 mákan hám awıl puqaralar jıyınlarına biriktirilgen bolıp, hár máhálleden 50 jámi 650 sociallıq járdemge mútáj shańaraqlarǵa hám olardıń perzentlerine Ǵárezsizligimizdiń 33 jıllıq bayramı múnásibeti menen azıq-awqat hám  mektep formaları sawǵa retinde tapsırıldı. Soń, miymanlar rayondaǵı “Ketenler” awıl puqaralar jıyını aymaǵındaǵı Xorezm wálayatı qáwenderliginde qurılıp atırǵan 50 orınlıq balalar baqshasınıń qurılıs jumısları menen tanıstı.