Aralboyında jańasha industriya hám isbilermenlik ruwxı

Qaraqalpaqstan Respublikasında samal elektr stanciyaları hám sanaat kárxanaları qurılısı baslandı, sawda kompleksleri iske túsirildi.

Usı múnásibet penen ótkerilgen máresimde Prezident Shavkat Mirziyoev Qaraqalpaqstannıń ekonomikalıq rawajlanıwı haqqında shıǵıp sóyledi.

Bunıń ushın aymaqta keń kólemli jumıslar alıp barılmaqta. Sońǵı bes jılda sanaat, isbilermenlik hám infrastruktura tarawlarında 50 den artıq jeńillikler berilgen. Sonnan, investiciya joybarların ámelge asırıw ushın tuwrıdan-tuwrı jer ajıratıw huqıqı tek ǵana Qaraqalpaqstanda engizilgen. Bahası 50 milliard sumnan joqarı joybarlarǵa infrastruktura da tartıp berilmekte.

Jeńillikler esabına ótken dáwirde isbilermenler ıqtıyarında 2 trillion sumnan artıq qarjı qalǵan.

Aymaqta isbilermenlik infrastrukturasın jaqsılaw ushın 44,5 trillion sum qarjı baǵdarlanǵan. Nátiyjede aqırǵı jıllarda 25 mıńnan artıq jańa isbilermenlik subekti payda bolǵan.

Bir ǵana ótken jılda 345 million dollarlıq 1 mıń 400 den artıq joybar ámelge asırılıp, 10 mıńnan artıq jańa jumıs ornı jaratıldı. Usı jıldıń birinshi yarımında 730 million dollar sırt el investiciyası ózlestirildi.

Qaraqalpaqstanda sırt el kapitalı menen shólkemlestirilgen kárxanalar sanı da kóbeyip barmaqta. 2017-jılda 73 sırt el hám qospa kárxana bolǵan bolsa, búgingi kúnde olardıń sanı 175 ke jetti.

Házirgi waqıtta aymaq ekonomikasına túrtki beriwshi derlik 9,5 milliard dollarlıq 120 dan artıq jańa iri joybarlar ámelge asırılmaqta. Usı joybarlar 2025-2028-jıllarda basqıshpa-basqısh iske túsiriledi. Nátiyjede 20 mıńnan artıq jumıs ornı, 12 trillion sumlıq islep shıǵarıw quwatlılıǵı hám byudjetke 500 milliard sum qosımsha túsim jaratıladı.