Prezident Shavkat Mirziyoev Qaraqalpaqstan Respublikasına saparın sanaat potencialı menen tanısıwdan basladı
Prezident Shavkat Mirziyoev Qaraqalpaqstan Respublikasına saparın sanaat potencialı menen tanısıwdan basladı «Nukus Electroapparat» qospa kárxanası 2017-jılda iske túsirilgen bolıp, onda elektr energiyası tarmaǵı ushın kernew úskeneleri islep shıǵarıladı. Usı jılı iyun ayında bul jerde 10 million dollardan aslam qarjı esabınan quyash panellerin islep shıǵarıw joybarı iske túsirildi. Úskeneler Koreya Respublikasınan alıp kelinip ornatıldı. Óndiris processi 100 procent avtomatlastırılǵan. Joybardıń jıllıq quwatlılıǵı 273 mıń dana. Bul elimizde alternativ energiyadan paydalanıw baǵdarındaǵı jumıslarda qol keledi. Házirge shekem túrli imarat hám shańaraqlarda 600 megavatt quwatlılıqtaǵı quyash panelleri ornatılǵan. Bul isler ele dawam etedi. Qospa kárxana ishki bazarda talap joqarı bolǵan ónimdi lokalizaciyalaw menen birge 4 million dollarlıq eksport imkaniyatına da iye boldı. 70 puqara jumıs penen támiyinlendi. Mámleketimiz basshısı jumıs processin kórip, jumısshılar menen sáwbetlesti. Juwapkerlerge bunday kárxanalardı kóbeytiw, olarda bazar talabı joqarı bolǵan ónimlerdi islep shıǵarıw boyınsha kórsetpeler berdi. Bul jerde tarmaq kárxanalarında islep shıǵarılıp atırǵan ónimler tanıstırıldı. Zavodtıń ózinde de 125 kilovatt quwatlılıqtaǵı quyash panelleri ornatılǵan. Onnan alınǵan elektr ishki mútájlikler ushın jumsaladı, artıqshası aymaqlıq elektr tarmaǵına satıladı. Keyingi jıllarda elimizde 2 milliard dollar investiciya esabınan quwatlılıǵı 2,6 gigavatt bolǵan 10 quyash hám samal stanciyaları iske qosıldı. Sonday-aq, ulıwma bahası 19 milliard dollar bolǵan 18,6 gigavattlı 32 «jasıl» joybar boyınsha jumıs alıp barılmaqta. Ulıwma aytqanda, 2030-jılǵa shekem energetika balansında qayta tikleniwshi quwatlıqlardıń úlesin 40 procentke jetkeriw maqset etilgen. 
