«Kishi bizneske kómeklesiw orayı» nıń ashılıw máresimi bolıp ótti.

Búgin Nókis qalasında «Kishi biznesti úzliksiz qollap-quwatlaw» kompleks dástúriniń orınlanıwın támiyinlew sheńberinde óz iskerligin alıp barıwshı «Kishi bizneske kómeklesiw orayı» nıń ashılıw máresimi bolıp ótti.

Ilajda Qaraqalpaqstan Respublikası Ministrler Keńesiniń baslıǵı F.Ermanov, «Biznesti rawajlandırıw bankı» AKB hám «Kishi biznesti rawajlandırıw qorı» basshıları, Ózbekstan Sawda-sanaat Palatasınıń Qaraqalpaqstan Respublikası basqarması basshıları, isbilermenler, ǵalaba xabar quralları wákilleri, jurnalist hám blogerler qatnastı.

Ilajdı Qaraqalpaqstan Respublikası Ministrler Keńesiniń baslıǵı F.Ermanov kiris sóz benen baslap berdi hám sońǵı jıllarda elimizde isbilermenlerdi qollap-quwatlaw baǵdarında kóp ǵana is-ilajlar ámelge asırılıp atırǵanlıǵın óz aldına atap ótti.

Shınında, 2023-jıldıń 14-sentyabr kúni Ózbekstan Respublikası Prezidenti tárepinen «Kishi biznesti rawajlandırıwdı materiallıq hám instituciyalıq qollap-quwatlaw is-ilajları haqqında» ǵı qararı qabıl etilgen edi. Qarar tiykarında jámi 14 aymaqta «Kishi bizneske kómeklesiw orayları» shólkemlestirildi.

Búgin Nókis qalasında óz iskerligin baslaǵan «Kishi bizneske kómeklesiw orayı» nda kishi biznes joybarların tańlaw, bul baǵdarda isbilermen hám isbilermenlikke qızıǵıwshı puqaralardı oqıtıw, qarjılandırıw, biznes rejeler islep shıǵıw, ónim ushın turaqlı bazar tabıw menen baylanıslı kompleks xızmetlerdi kórsetiw sıyaqlı is-ilajlar ámelge asırıladı.

Ilaj dawamında keń jámiyetshilik wákilleri Orayda jaratılǵan zamanagóy shárt-shárayatlar menen jaqınnan tanıstı. Usınday imkániyatlar negizinde Qaraqalpaqstan Respublikasında isbilermenlerdiń sanı jáne de artıwı sózsiz.