Korrupciyaǵa qarsı gúresiw máseleleri qarap shıǵıldı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev korrupciyaǵa qarsı gúresiw hám komplaens-qadaǵalaw xızmetleriniń jumısların jedellestiriw baǵdarında ámelge asırılıp atırǵan ilajlarǵa arnalǵan májilis ótkerdi. Onda dáslep búgingi kúnde mámleketimizde korrupciyaǵa qarsı gúresiw baǵdarında qabıl etilip atırǵan nızam hújjetleri, ámelge asırılıp atırǵan keń kólemli ilajlarǵa toqtalıp ótildi. Sonday-aq, ámelge asırılıp atırǵan bunday ilajlarǵa qaramay ayırım orınlarda bir qatar nızambuzıwshılıq jaǵdayları ushırasıp atırǵanlıǵı sın kóz qarasta kórip shıǵıldı. 
Ótken 2023-jılda respublika boyınsha 530 túrli dárejedegi lawazımlı hám juwapker shaxslar sonday-aq, puqaralar tárepinen korrupciya menen baylanıslı 304 jınayatqa qol urılǵan. Bul jınayatlar aqıbetinde mámleket hám jámiyet máplerine bir qatar finanslıq zıyanlar jetkerilgen. Anıqlanǵan korrupciya menen baylanıslı jınayatlar boyınsha ayırım ministrlik, uyımlar hám shólkemlerdegi “komplaens qadaǵalaw” sisteması xızmetkerleri tárepinen tekseriw-úyreniw, monitoring, sorawnamalar ótkeriw, mámleketlik satıp alıwlardı ámelge asırıwda mápler toqnasıwın analizlew hám sol sıyaqlı jumıslar tolıq jolǵa qoyılmaǵan. Búgingi kúnde bul Kompleans qadaǵalaw bólim xızmetkerleri tek ǵana úgit-násiyat jumısların ótkeriw menen sheklenbekte. Sonıń menen birge ayırım ministrlik, mákeme hám shólkemlerde finans-ekonomikalıq jumıslardı tártiplestiriw hám qadaǵalap barıwshı ishki audit xızmetleri shólkemlestirilgen bolıp, ayırımları tárepinen óz xızmet wazıypalarına suwıqqanlıq penen qarap, jumıslarına nemquraydılıq kóz qarasta bolǵan. Ayırım mákemelerdiń ishki audit xızmeti tárepinen korrupciyaǵa baylanıslı nızamsız háreket islengenligi boyınsha birde-bir tekseriw yaki úyreniw jumısları ótkerilmegen. Ótkerilgen májiliste búgingi kúnde bul ishki audit xızmetkerleri tek ǵana profilaktika jumısların ótkeriw menen sheklenip qalıp atırǵanlıǵı, sonıń menen birge jumıs alıp barıp atırǵan Respublika boyınsha tiyisli tarawlardı qadaǵalawshı inspekciyalardıń jumısları da talap dárejesinde emesligi sınǵa alındı. Sonday-aq, óz wazıypasın atqarıwda nemquraydılıq penen qaraǵanı, belgilengen wazıypalardı orınlawda qáte-kemshiliklerge jol qoyǵanı ushın Qurılıs tarawında qadaǵalaw inspekciyası baslıǵı, Kán-geologiya jumısın qadaǵalaw “Arqa-Batıs regionallıq inspekciyası” baslıǵı, Mektepke shekemgi hám mektep bilimlendiriw ministrligi kompleans qadaǵalaw bólimi xızmetkeri, Densawlıqtı saqlaw ministrligi ishki audit xızmeti xızmetkeriniń lawazımına ılaylıqlıǵın kórip shıǵıw boyınsha tapsırma berildi. Májilis juwmaǵında tiyisli wazıypalar belgilep alındı. 