Máhálle sistemasın jáne de rawajlandırıw máseleleri dodalandı
Prezident Shavkat Mirziyoevtiń basshılıǵında 26-sentyabr kúni máhálle kesiminde islew sistemasın jáne de kúsheytiw ilajların dodalaw boyınsha videoselektor májilisi ótkerildi. Mámleketimizde barlıq sociallıq-ekonomikalıq baǵdarlamalar xalıqtıń talabınan kelip shıǵıp, orınlarda ámelge asırılmaqta. Onıń ushın máhállelerge kóplegen wákillikler, shólkemlestiriw hám qarjı imkaniyatları berildi. Máhálle baslıǵı, hákim járdemshisi, hayal-qızlar belsendisi, jaslar jetekshisi hám profilaktika inspektorlarınan ibarat «beslik sisteması» shólkemlestirildi. 
Biraq olardıń óz-ara muwapıq islewinde kemshilikler, júdá kóp tákirarlanıwlar bar. Sociallıq maqsettegi qarjılar ayırım waqıtları nátiyjesiz baǵlarlanbaqta. Járdemge mútáj xalıqtıń máselesin sheshiw wálayat hám respublika uyımına baylanıslı bolıp qalǵan. Máhálle xızmetkerleriniń jumısın bahalaw norması joq. Olardıń kóp waqıtı «qaǵaz toltırıw» hám májilislerge ketip atır. Májiliste usınday kemshilikler tallanıp, sistemanı jetilistiriw hám nátiyjeliligin arttırıw boyınsha jańa qatnaslar belgilendi. 
Oǵan bola, máhálle basqarıwına salıqshı hám sociallıq xızmet xızmetkeri de qosılıp, «máhálle jetiligi» boladı. Járdemge mútáj xalıqtı dizimge kirgiziw, materiallıq járdem, subsidiya hám kredit ajıratıw sıyaqlı 70 ten aslam máseleler, rayon hám wálayat uyımlarına shıqpastan, máhálleniń ózinde jámáátlik túrde sheshiledi. Sonday-aq, Bántlik, Isbilermenlik hám Jumıstı úyge bólip alıp islew qorlarınıń qarjıları hár bir máhállege bólistirip beriledi. 
Máhállede qolaylı elektron jumıs alıp barıw jolǵa qoyıladı. Ámeldegi úsh platforma – «Onlayn máhálle», «Hayal-qızlar», «Jaslar portalı» óz-ara integraciyalanıp, birden-bir sistemaǵa jámlestiriledi. «Máhálle jetiligi» jumısın muwapıqlastırıwda máhálle baslıqlarınıń wákillikleri keńeytiledi. Sonıń ishinde, olar hákim járdemshisi, jaslar jetekshisi, hayal-qızlar belsendisi, profilaktika inspektorı, salıqshı hám sociallıq xızmetkerdi xoshametlew yamasa intizamiy jaza qollanıw boyınsha usınıs xatın kirgiziw wákilligine iye boladı. 
Solardan kelip shıǵıp, juwapkerlerge «máhálle jetiligi»niń wazıypaların anıq belgilew hám jumısın durıs baǵdarlaw boyınsha kórsetpeler berildi. Sociallıq joybarlarǵa ilimiy hám mámleketlik emes shólkemlerdi de tartıw zárúr ekenligi aytıldı. Májiliste máhálle sistemasın jetilistiriwdiń shólkemlestiriw ilajları da belgilendi. Atap aytqanda, máhállelerdi rawajlandırıw hám qollap-quwatlaw boyınsha respublikalıq, wálayatlıq hám rayon (qala)lıq keńesler engiziledi. Respublikalıq keńeske – Bas ministr, aymaqlıq keńeslerge bolsa hákimler basshılıq etedi. Keńesler «máhálle jetiligi» qoyǵan máselelerge sheshim tabadı, qarjı dáreklerin sheship beredi. 
Juwapkerlerge dodalawda bildirilgen barlıq usınıslardı inabatqa alǵan halda, tarawdıń shólkemlestiriw strukturası, wákillikleri hám qarjılandırıw dárekleri kórsetilgen hújjet joybarın islep shıǵıw tapsırıldı. 
– Biz jumısımızdıń birinshi kúnlerinen barlıq jumıstı máhállede, xalqımız benen birgelikte shólkemlestirip kelmektemiz. Bul sistemanı basqıshpa-basqısh rawajlandırdıq. Endi jáne qosımsha kúsh, imkaniyatlar berilmekte. Bul hám wákillik, hám juwapkershilik degeni. Máhálleler – mámlektimizdiń eń úlken tiykarı,-dedi Shavkat Mirziyoev. Májilis sońında ministrler hám hákimler, orınlardan máhálle baslıqları usı baǵdarda ámelge asırılıp atırǵan jumıslar hám jańa tapsırmalardan kelip shıǵıp keleshektegi jumıs rejeleri boyınsha málimleme berdi. ÓzA