Biziń jerimiz, keleshegimiz: shólleniwge qarsı gúreste xalıqaralıq birge islesiw
Biziń jerimiz. Biziń keleshegimiz” konferenciyasında Konvenciyaǵa aǵza 197 mámleket (196 mámleket hám Evropa Awqamı) wákilleri qatnaspaqta. Konferenciya usı jıldıń 13-dekabrine shekem dawam etedi. 2-13 dekabr kúnleri Saudiya Arabstanı paytaxtında Birlesken Milletler Shólkeminiń Shólleniwge qarsı gúresiw haqqındaǵı konvenciyası qatnasıwshılarınıń konferenciyası bolıp ótpekte. Sammittiń dáslepki kúnlerinde bir qatar joqarı dárejedegi ushırasıwlar ótkeriliwi rejelestirilgen bolıp, onda qatnasıwshılar jerlerdiń degradaciyası, topıraqtıń jamanlasıwı hám qurǵaqshılıq penen baylanıslı mashqalalardı dodaladı. Konferenciya juwmaǵında juwmaqlawshı deklaraciya qabıl etiliwi kútilmekte. Sonday-aq, panel sessiyasında Aralboyı xalıqaralıq innovaciya orayınıń direktorı Shinjan-Uyǵur avtonom rayonı toǵay xojalıǵı hám jaylawlar milliy byurosınıń basshıları menen ushırastı. Bunnan tısqarı, Qıtay, BAÁ, Iran hám basqa da mámleketlerdegi sherikler menen sóylesiwler ótkerildi. Tiykarǵı temalar ekologiya tarawındaǵı birge islesiwdi rawajlandırıw, innovaciyalıq texnologiyalardı engiziw hám birgeliktegi joybarlardı, sonıń ishinde, terek egiw baslamaların ámelge asırıw imkaniyatları boldı. Bul ushırasıwlar xalıqaralıq sheriklerdiń ekologiyalıq mashqalalardı sheshiw hám turaqlı rawajlanıw jolındaǵı birge islesiwdi bekkemlew baǵdarındaǵı háreketlerin birlestiriwden mápdar ekenin tastıyıqladı. Ushırasıw juwmaǵında qorshaǵan ortalıqtı qorǵawǵa qaratılǵan birgeliktegi joybarlardı islep shıǵıw, sonday-aq, jer degradaciyasın monitoring etiw, shólleniw hám shań boranlarına qarsı gúresiw tarawında birge islesiwdi keńeytiwge kelisip alındı. 
