Ózbekstan Prezidenti hám Vengriya Bas ministri ekonomikalıq joybarlardıń jańa portfelin qáliplestiriw áhmietli ekenin atap ótti
Ózbekstan Prezidenti hám Vengriya Bas ministri ekonomikalıq joybarlardıń jańa portfelin qáliplestiriw áhmietli ekenin atap ótti
6-noyabr kúni Bishkek qalasında ótip atırǵan Túrkiy mámleketler shólkeminiń sammiti sheńberinde Ózbekstan Respublikası Prezidenti Shavkat Mirziyoyev ózine ajıratılǵan rezidenciyada Vengriya Bas ministri Viktor Orban menen ushırasıw ótkerdi. Ózbekstan-Vengriya strategiyalıq sheriklik hám kóp qırlı birge islesiw qatnasıqların bunnan bılay da rawajlandırıwdıń áhmiyetli máseleleri dodalandı. Óz-ara birge islesiwdiń ámeliy nátiyjeleri ayrıqsha qanaatlanıwshılıq penen atap ótildi. Tovar almasıw kórsetkishleri hám sanaat kooperaciyası kólemi artıp barmaqta, Tashkent wálayatında industrial park shólkemlestiriw jumısları alıp barılmaqta. Oktyabr ayında Qoqand qalasında birinshi Aymaqlar forumı ótkerildi. Usı ayda Budapesht qalasında áhmietli birgeliktegi mádeniy ilajlar bolıp ótedi. Mámleket basshıları eki tárepleme ilajlar rejesin kórip shıqtı. Jetekshi kompaniyalardıń sawda-ekonomikalıq hám investiciyalıq birge islesiw boyınsha jańa joybarlar portfelin qáliplestiriw áhmietli ekenligi ayrıqsha atap ótildi. Regionallıq kún tártibindegi áhmietli máseleler boyınsha da pikir alısıldı.