Prezident Shavkat Mirziyoyev “Ustazlar hám muǵallimler kúni” múnásibeti menen bilimlendiriw tarawında ayrıqsha órnek kórsetken xızmetkerlerden bir toparına mámleketlik sıylıqlardı tapsırdı.

Tashkent qalasında 1-oktyabr  ̶  “Ustazlar hám muǵallimler kúni” múnásibeti menen saltanatlı máresim bolıp ótti. Prezident Shavkat Mirziyoyev sóziniń basında barlıq bilimlendiriw hám tárbiya xızmetkerlerin bayram menen qızǵın qutlıqlap, xalqımızdıń tereń húrmet-izzetin jetkerdi. – Biz ustazdı ataday ullı dep bilgen, onı bárqulla basına kóterip húrmet etken ullı, aǵartıwshı xalıqtıń wákillerimiz. Tariyxımızdaǵı qaysı belgili ata-babalarımızdı almayıq, olardıń barlıǵı ustazlarǵa joqarı húrmet penen qaraǵanınıń gúwası bolamız. Ustazın, muǵallimin húrmet etken jámiyet álbette rawajlanadı, gúllep-jasnaydı. Muǵalliminiń qádiri joqarı bolǵan xalıqtıń abırayı joqarı boladı, – dedi mámleketimiz basshısı. Turmısta hár bir jaqsılıq, hár bir jaratılıw hám tabıstıń tiykarında oqıtıwshınıń miyneti, shıdamlılıǵı hám mehir-muhabbatı jámlengeni atap ótildi. – Bilimlendiriw – tarawlar ishinde eń áhmiyetlisi, mektep – eń tiykarǵısı bolsa, oqıtıwshılıq kásipler arasında eń ullısı bolıp esaplanadı. Jeke men muǵallim degende, ózim ushın áziz hám qádirli bolǵan insanlardı, júz-kózinen nur jawıp turatuǵın húrmetli insanlardı kóz aldıma keltiremen. Olar zamanımızdıń eń aldıńǵı adamları, jankúyer, watansúygish, xalıqshıl insanlar bolıp esaplanadı. Sol sebepli xalqımız óziniń eń úlken baylıǵın – perzentleriniń tárbiyasın oqıtıwshılarǵa isenip tapsıradı, – dep atap ótti Shavkat Mirziyoyev. Ustazlardıń danıshpanlıǵı, turmıs mazmunın tereń túsinip, adamlardı jaqsılıqqa hám tabıslarǵa ruwxlandıratuǵını atap ótildi. – Insannıń kózqarası, dúnyaqarası ózgermese, jámiyet ózgermeydi. Jámiyet ózgermese, rawajlanıw da bolmaydı. Adamlardıń pikirin, sol tiykarda pútkil jámiyetti kim ózgerte aladı? Jana Beruniylerdi, Xorezmiy hám Ferǵaniylerdi kim kamalǵa jetkeredi? Bunday ullı wazıypanı, haqıyqıy mánistegi tariyxıy missiyanı orınlawǵa tek siz – ustaz hám oqıtıwshılar ózińiz qádirsiz, – dedi Prezident. Búgin elimizdiń ul-qızları xalıqaralıq pán olimpiadalarında, sport maydanlarında úlken orınlardı qolǵa kirgizip atırǵanı eske alındı. Bul jeńisler bárinen burın ustaz-trenerlerdiń pidákerlik miyneti nátiyjesi ekeni tán alındı. Ózbekstan Respublikası Prezidentiniń 27-sentyabrdegi pármanına muwapıq, bilimlendiriw-tárbiya tarawına qosqan múnásip úlesi, salamat hám bárkamal áwladtı tárbiyalawdaǵı órnekli jumısı jáne jámiyetlik turmıstaǵı belsene qatnası ushın bir topar watanlaslarımız húrmetli ataq, orden hám medallar menen sıylıqlanǵan edi. Ilajda mine usı sıylıqlar óz iyelerine saltanatlı túrde tapsırıldı. – Óz miyneti menen qádir tabıw, el-jurt ardaǵında bolıw shın mánisinde baxıt. Bul, ásirese, oqıtıwshı hám ustazlarǵa jarasadı. Qádirińiz de, qáddińiz de bárqulla joqarı bolsın, áziz ustazlar, – dedi Shavkat Mirziyoev. Sıylıqlanǵanlar atınan shıǵıp sóylegenler bilimlendiriw tarawı hám muǵallimlerge itibarı, kishipeyil xızmetlerin joqarı bahalaǵanı ushın mámleketimiz basshısına minnetdarshılıq bildirdi.