Qaraqalpaqstanǵa investiciya aǵımı kóbeymekte

Qaraqalpaqstanǵa investiciya aǵımı kóbeymekte Sońǵı 7 jılda Qaraqalpaqstan Respublikasında 17 trillion 800 milliard sumlıq 6 mıń 784 joybar ámelge asırılǵan. Olardıń nátiyjesinde 56 mıń jumıs ornı jaratılǵan. Usı dáwirde 2 milliard 815 million dollarlıq ónim hám xızmetler eksport etilgen. Bıyıl Qaraqalpaqstanda ulıwma bahası 874 million dollarlıq 470 joybar ámelge asırılmaqta. Bul turaqlı dawam ettirilip, Qaraqalpaqstanda sırt el investorları hám jergilikli isbilermenler tárepinen ulıwma bahası 9,5 milliard dollarlıq 124 joybar qáliplestirilgen. Sonnan derlik 1 milliard 800 million dollarlıq 10 joybar mámleketimiz basshısına tanıstırıldı. Joybarlarǵa Qıtay, Saudiya Arabstanı, Germaniya, Rossiya, Ispaniya sıyaqlı mámleketlerdiń kompaniyaları investiciya kirgizbekte. Olar energetika, ıssılıq támiynatı, taw-kán hám ximiya sanaatı, qurılıs materialları, xızmet kórsetiw hám basqa da tarmaqlardı qamtıp alǵan. Máselen, Saudiya Arabstanı menen birgelikte Nókis qalasında oraylasqan ıssılıq támiynatı sistemasın jaqsılaw, Ispaniya investiciyasınıń qatnasıwında Qaraózek rayonında quyash hám samal elektr stanciyaların qurıw, germaniyalı investorlar tárepinen Nókis rayonında mıstı qayta islew hám kabeller islep shıǵarıw joybarların ámelge asırıw rejelestirilgen. Bul 124 joybar nátiyjesinde 20 mıńnan aslam adam jumıs penen támiyinlenedi. Mámleketimiz basshısı isbilermenlerge hár tárepleme járdemshi bolıp, joybarlardı jedellestiriw áhmiyetli ekenligin atap ótti.