Usı jıldıń 27-mart kúni Qaraqalpaqstan Respublikası Ministrler Keńesi Baslıǵı F.Ermanov Global jasıl ósiw institutınıń (GGGI) Ózbekstandaǵı wákili menen ushırasıwı bolıp ótti
Usı jıldıń 27-mart kúni Qaraqalpaqstan Respublikası Ministrler Keńesi baslıǵı F.Ermanov Global jasıl ósiw institutınıń (GGGI) Ózbekstandaǵı wákili Doktor Aaron Rassel, Koreya Xalıqaralıq birge islesiw agentligi (KOICA) tárepinen qarjılandırılǵan hám Global jasıl ósiw institutı (GGGI) tárepinen ámelge asırılıp atırǵan «Aral teńizi apatshılıǵınıń tásirin saplastırıw ushın Qaraqalpaqstan Respublikasın jasıl reabilitaciyalaw» investiciyalıq joybarı baslıǵı Ji Un Kim, usı joybardıń klimatqa beyimlesken awıl xojalıǵı boyınsha aǵa qánigesi Azat Tilewmuratov, klimatqa turaqlı awıl xojalıǵı texnologiyaları boyınsha aǵa qánigesi Baxıt Aybergenov, joybar qánigeleri Daniyar Maxmudov hám Shaxista Abutovalar menen ushırastı.
Qabıllaw barısında Farxad Ermanov joybardı Qaraqalpaqstan Respublikasında ámelge asırıp atırǵanı ushın Global jasıl ósiw institutına minnetdarshılıq bildirdi hám joybardı ámelge asırıw barısındaǵı jetiskenlikler menen birge jiberilgen qáte-kemshiliklerge de toqtalıp ótti.
Sonday-aq, Qaraqalpaqstan Respublikası Ministrler Keńesi Baslıǵı Qaraqalpaqstanda ámelge asırılıwı zárúr bolǵan agro hám suw únemlewshi texnologiyalardı, atap aytqanda, jamǵırlatıp suwǵarıwdıń baraban tipindegi úskenelerin, lazer jer tegislewshi úskenelerdi, jerdi súrmesten egiw ushın arnalǵan seyalkalardı, baǵlardı tamshılatıp suwǵarıw úskenelerin alıp kelip óndiriske endiriwdi usınıs etti.
Bunnan soń Global jasıl ósiw institutınıń (GGGI) Ózbekstandaǵı wákili Doktor Aaron Rassel joybardıń jetiskenlikleri haqqında hám jobalastırılıp atırǵan ilájlar haqqında toqtaldı.
Qaraqalpaqstan Respublikası Ministrler Keńesi Baslıǵı F.Ermanov Global jasıl ósiw institutı menen keleshekte úlken kólemdegi joybarlardı birge ámelge asırıw zárúr ekenligin atap ótti.