QMUda «Ózbekstan – ulıwma úyimiz» atamasında festival bolıp ótti
Berdaq atındaǵı Qaraqalpaq mámleketlik universitetinde «Ózbekstan – ulıwma úyimiz» atamasında festival bolıp ótti. Onda Qaraqalpaqstan Respublikası Ministrler Keńesi Baslıǵınıń orınbasarı R.Nurazizov, sonday-aq, «Qazaq», «Rus», «Ukrain», «Túrkmen», «Koreec» mádeniy milliy oraylarınan bir qatar wákilleri hám universitettiń professor-oqıtıwshıları, student-jasları qatnastı. 
Dáslep miymanlar studentler tárepinen islengen milliy kiyimler, qol óneri úlgileri, súwretler kórgizbeleri, túrli millet wákilleriniń salt-dástúrlerin, milliy sport oyınların tamashaladı. Sonday-aq, festival sheńberinde doslıq baǵın jaratıw maqsetinde universitet átirapına terek nálleri egildi. Bunnan soń, «Ózbekstan – ulıwma úyimiz» atamasında bayram keshesi baslandı. Kesheni Berdaq atındaǵı Qaraqalpaq mámleketlik universiteti rektorı A.Reymov ashıp berdi. Ol óz shıǵıp sóylewinde mámleketimizde 130 dan artıq millet wákilleri bir shańaraq prezentlerindey bolıp, teń huquqlı hám óz-ara awızbirshilikte jasap, kiyatırǵanlıǵın, olardıń huqıq hám erkinlikleri, nızamlı máplerin támiyinlew, bilim alıwı, kásip-óner úyreniwi, mádenyatları, úrip-ádet dástúrlerin saqlaw hám rawajlandırıw ushın mámleketimiz tárepinen barlıq shárayatlar jaratılıp berilgenligin aytıp ótti. 
Bunnan soń, Qaraqalpaqstan Respublikası Ministrler Keńesi Baslıǵınıń orınbasarı R.Nurazizov sózge shıǵıp, Ózbekstan Respublikasında milletler aralıq hám diniy keń peyillik tarawında ámelge asırılıp atırǵan keń kólemli jańalanıwlar jámiyette milletler aralıq tatıwlıq, óz-ara húrmet, mehir-miriwbet, tınıshlıq hám tatıwlıqtı bekkemlew, sociallıq-ruwxıy ortalıqtı támiyinlew, búgingi kúnde xalıqtı razı qılıw ushın elimizde alıp barılıp atırǵan reformalar, unamlı nátiyjesin berip atırǵanlıǵın óz shıǵıp sóylewinde keltirip ótti hám usınday bayram ilajın shólkemlestirgeni ushın universitet jámáátine húrmet jarlıǵın tapsırdı. Sonıń menen birge, festival sheńberinde mádeniy milliy oraylardıń kórgizbesi hám universitetimizdiń belsendi student-jaslarınıń koncert baǵdarlaması jıynalǵanlardıń názerine usınıldı. 
Haqıyqatında da, mámleketimizde milletleraralıq tatıwlıq hám diniy keńpeyillik principleri qarar taptırıw, milletlerdiń hár tárepleme rawajlanıwı, olardıń milliy qádiryatların saqlap qalıw, úrip-ádet dástúrlerin rawajlanıwına mámleketimizde barlıq imkaniyatlar jaratılǵan bolıp, bul óz gezeginde kóp milletli xalqımızdıń milletleraralıq tatıwlıqtı bekkemlew Ana-Watanımızdıń elede gúllep jasnawına xızmet qıladı.