28.03.2024, Piyshembi

«Abat hám payızlı máhálle – elimiz kórki» súreni astında ulıwma xalıqlıq qayırqomlıq shembiligi ótkerildi

Úlkemizge báhár paslı kirip keldi. Jańalanıw hám jasarıw máwsiminde Nawrız bayramın múnásip belgilew hámde Ramazan ayın qarsı alıwǵa tayarlıq kóriw maqsetinde usı jıldıń 18-mart kúni elimizde «Abat hám payızlı máhálle – elimiz kórki» súreni astında ulıwma xalıqlıq qayırqomlıq shembiligi ótkerildi.


Onda, Qaraqalpaqstan Respublikası Ministrler Keńesiniń Baslıǵı F.Ermanov, Joqarǵı Keńesi Baslıǵınıń orınbasarı R.Saparbaev, Ózbekstan Respublikası Toǵay xojalıǵı mámleket komiteti baslıǵınıń orınbasarı Ǵ.Qurbonov, senatorlar, deputatlar, nuranıyler hám jaslar qatnasıp, hár bir watanlasımızdı óziniń jasap turǵan aymaǵın, kóshesin hám máhállelerdegi puqaralardı abadanlastırıwǵa belsene qatnasıwǵa, shembilik kúnleri xalıqtıń, ásirese, jaslardıń sanasında «Abadan turmıs kewilden baslanadı» degen túsinikti tereń sińdiriw, óz úyin, máhállesin taza, azada saqlaw, abat bolıwına úlesin qosıw, bul processlerge jámlesken halda, jámáát bolıp qatnasıw úlken áhmiyetke iye ekenligin atap ótti.


Bunnan soń, belgilengen aymaqqa, shembilik qatnasıwshıları tárepinen dekorativ hám miyweli náller egildi.