17.08.2022, Sárshembi

«Insan salamatlıǵı» qayırqomlıq akciyasında 4338 puqara medicinalıq kórikten ótkerildi

Respublikamızdıń medicinalıq járdemge mútáj puqaralarına ayrıqsha qolaylıqlar jaratıw maqsetinde usı jıldıń 27-28-iyul kúnleri Densawlıqtı saqlaw ministrliginiń shólkemlestiriwinde «Insan salamatlıǵı» atamasında qayırqomlıq akciyası ótkeriliwi belgilengen edi.

Eki kún dawamında Qaraqalpaqstan Respublikası puqaraları ózlerin qıynap júrgen kesellikleri boyınsha qánigelerden biypul medicinalıq konsultaciya hám járdemler aldi.


Ótkerilgen akciyada respublika qánilegestirilgen ilimiy-ámeliy medicinalıq oraylarınan 14, Buxara wáalyatınan 44, Xorezm wálayatınan 22, Nókis qalası qánilegestirilgen ilimiy-ámeliy medicinalıq orayınıń aymaqlıq filialı hám Qaraqalpaq medicina institutı klinikasınan 62 joqarı mamanlıqtaǵı medicina xızmetkerleri qatnastı.


Sonıń menen birge, 2 dana mobil mammograf, mobil rentgenografiya avtotransportı, 2 dana mobil dárixana, 2 mobil klinika (UZI, oftalmologiya) shólkemlestirildi. Qayırqomlıq akciyasında jámi 4338 puqara ultrasesli tekseriw (UZI),  elektrokardiografiya (EKG),  rentgen tekseriwinen, mammograf hám taǵı basqada medicinalıq kóriklerden ótkerildi. 

 

Sonday-aq, akciya dawamında 597 puqaraǵa dári-darmaq, fitochay, sociallıq qorǵawǵa mútáj 120 puqaraǵa mayıplar kreslo-arbası, 50 tonometr, 35 esitiw maslaması hám 233 puqaraǵa háreket tayansh quralları biypul tarqatıldı.


Eki kún dawamında bolıp ótken «Insan salamatlıǵı» qayırqomlıq akciyasına óziniń múrájatı menen kelgen 403 puqara Qaraqalpaqstan Respublikasınıń 13 medicinalıq mákemelerine emleniw ushın jatqarıldı. Atap aytqanda, 322 puqaraǵa konservativ, 81 puqaraǵa operativ (sonnan 46 puqaraǵa joqarı texnologiyalıq) járdemler kórsetildi.

Álbette bulardıń barlıǵı insan qádiri ushın ámelge asırılǵan ámeliy jumıslar esaplanadı.




QR Densawlıqtı saqlaw ministrligi