29.03.2024, Juma

Nókis rayonında IT oqıw orayı iske tústi

“Turaqlı rawajlanıwǵa erisiw ushın biz sanlı bilimlerdi hám xabar texnologiyaların tereń ózlestiriwimiz kerek, bul bolsa bizge hár tárepleme rawajlanıwǵa erisiw ushin eń qısqa joldan barıwımızǵa imkan beredi. Búgingi dúnyada sanlı texnologiyalar bárshe tarawlarda sheshiwshi ról oynamaqta”, degen edi jurtbasshımız Sh.M.Mirziyoev.

Keyingi jıllarda mámleketimizde hár bir tarawda túpkilikli ózgerisler júz berdi. Solardıń qatarında búgingi zamannıń talabındaǵı úlken rawajlanıwdıń biri bul – IT (informaciyalıq texnologiya)larǵa bolǵan itibardiń kúnnen-kúnge artıp barıwında.


Búgin, Nókis rayonında náwbettegi 16- “Sanlı texnologiyaları” orayınıń saltanatlı ashılıw keshesi bolıp ótti. Keshege Ózbekstan Respublikası axborot texnologiyaları hám kommunikaciyaların rawajlandırıw ministrligi Qaraqalpaqstan Respublikası aymaqlıq basqarması baslıǵı Timur Reyimbaevich, Qaraqalpaqstan Respublikası Ministrler keńesi baslıǵınıń orınbasarı Rustembay Rajapbaev Tursınbaevich, Nókis rayonı hákimi Ómirbay Amanbaevich, IT center Qaraqalpaqstan Respublikası filiali direktori Madiyar Elmuratovlar qatnastı hám IT tarawınıń mámleketimizde rawajlanıwındaǵı tutqan ornı haqqında keń túrde atap ótti. 


Ashılıw máresimine Nókis rayonı xalqı, nuraniyler oqiwshi-jaslar, respublikadaǵı IT tarawı shólkem baslıqları, taraw qánigeleri qatnastı.

Bunnan keyin, bárshe miymanlar IT orayında jaslar ushın jaratılǵan shárayatlar hám onıń ishki imkaniyatları menen jaqınnan tanıstı. 


Oqıw orayı zamanagóy inventorlar menen tolıq táminlengen bolıp, bul jerde altı dógerek xanası, eki kompyuter xanaları rayon jaslarınıń joqarı dárejede bilim alıwı ushın imkan jaratadı.  

Oqıw orayında jaslarımız: 

- veb programmalastırıw; 

- mobil robototexnika; 

- kompyuter sawatxanlıǵı

- veb dizayn

- android qosımshalardı jaratıw

- kibersport

- IT-English dógereklerinde oqıw imkanıyatina iye.  


IT center Qaraqalpaqstan Respublikası filialı baspasóz xızmeti