16.04.2021, Juma

KOREYA QARAQALPAQSTAN MENEN BIRGE ISLESEDI



    Qaraqalpaqstan Respublikası Ministrler Keńesinde Koreya Respublikasınıń isbilermen, jámiyetlik hám bilimlendiriw toparı wákilleriniń, sonday-aq, respublikamızdaǵı bir qatar ministrlikler menen vedomstvolardıń basshıları, isbilermenlik subekt¬leriniń qatnasında  biznes-forum bolıp ótti.
Ilajda Qaraqalpaqstan Respublikası Ministrler Keńesi Baslıǵınıń orınbasarı B.Habibullaev, Koreyanıń «Evergreen Motors Group» kompaniyasınıń baslıǵı Kim Chang Keon, Koreya¬nıń bilimlendiriw hám tálim ilim-izertlew institutınıń baslıǵı Kim Yun Se hám basqalar shıǵıp sóylep, sapardıń maqseti hám wazıypaları, onıń sheńberinde ámelge asırılatuǵın joybarlar, keleshektegi birge islesiw boyınsha óz-ara paydalı pikir alısıwlar boldı.
Atap ótilgenindey, elimiz ǵárezsizlikke erisken dáslepki jıllardan baslap Qubla Koreya menen túrli tarawlarda birge islesiw hár tárepleme rawajlanıp barmaqta. Respublikamızdıń aymaǵındaǵı Súrgil káni negizinde qurılǵan Ústirt gaz-ximiya kompleksi bunıń ayqın mısalı bolıp tabıladı. Bunnan tısqarı, kishi biznes hám jeke isbilermenlik, bilimlendiriw, densawlıqtı saqlaw, turizm tarawlarında da birge islesiw jaqsı jolǵa qoyılmaqta. Miymanlardıń bul rettegi saparı Qaraqalpaqstan Respublikası menen Ózbekstannıń Koreya Respublikasındaǵı elshixanası arasında tastıyıqlanǵan «jol kartası» sheńberinde ámelge asırılmaqta.
Ilaj qatnasıwshıları ózlerin qızıqtırǵan bir qatar sorawlarǵa juwap aldı.
    Kúnniń ekinshi yarımında miymanlar paytaxtımızdaǵı respublikalıq kardiologiya dispanserinde,  O.Xalmuratov atındaǵı respublikalıq kóp tarmaqlı medicina orayında bolıp, xalıqtıń densawlıǵın saqlaw jolında ámelge asırılıp atırǵan jumıslardı, naw¬qaslarǵa jaratılǵan sharayatlardı barıp kórdi.
Delegaciya aǵzaları Tashkent mámleketlik pediatriya institutı Nókis filialında maman qánigeler tayarlawdıń barısı menen tanıstı. Prezidentimiz Shavkat Mirziyoevtiń tikkeley baslaması menen filial janında kóp tarmaqlı klinikanıń qurılıs jumısları tezletilgen pát penen alıp barılmaqta. Búgingi kúni oqıw ornı jáhánniń bir qatar xalıqaralıq, sonıń ishinde Koreya Respublikasınıń abıraylı klinikaları menen birgelikte jumıslar alıp barmaqta.  Miymanlar Qubla Koreyanıń «Chunnam» emlewxanasınıń klinikasında usı filialdıń eki qánigesiniń mamanlıǵın jetilistiriliwine, jańadan qurılıp atırǵan klinikaǵa zamanagóy medicinalıq ásbap-úskeneler jetkerip beriwde ámeliy járdem kórsetiletuǵınlıǵın bildirdi.
    Qaraqalpaqstan Respublikası Joqarǵı Keńesinde Koreyanıń rawajlandırıw hám bilimlendiriw qorı menen birge islesiw boyınsha Memorandumǵa qol qoyısıw saltanatı boldı. Úsh jılǵa mólsherlengen bul hújjet sheńberinde koreec tilin úyreniw boyınsha oray ashılıp, onıń materiallıq-texnikalıq bazası bekkemlenedi. Bul keleshekte shet elge jumıs islewge baratuǵın jergilikli qánigelerdi tayarlawda da ayrıqsha áhmiyetke iye boladı.
Sapar sheńberinde miymanlar Beruniy rayonında da bolıp, jılına 800 mıń tonna cement islep shıǵarıw quwatlılıǵına iye zavodtıń qurılısı ushın ajıratılǵan jer maydanı menen tanıstı. Qubla Koreyanıń jetekshi qurılıs kompaniyaları menen birgelikte qurılatuǵın jańa zavodtıń iske túsiriliwi, jergilikli bir qatar jaslar ushın jańa jumıs ornın ashıw imkaniyatın beredi.
    Delegaciya aǵzaları I.V.Savickiy atındaǵı Qaraqalpaq mámleketlik kórkem-óner muzeyinde, paytaxtımızdıń basqa da bir qatar dıqqatqa ılayıq orınlarında boldı.  Eki kúnlik sapar dawamında alıp barılǵan sóylesiwler jáhánde jetekshi eller qatarınan orın iyeleytuǵın Koreya Respublikası menen isbilermenlik, densawlıqtı saqlaw, bilimlendiriw, turizm hám basqa tarawlardaǵı birge islesiwde jańa bas¬qısh bolıp qaladı.