23.04.2019, Siyshembi

Mashqala bar, sheshim de bar

Qońırat rayonı "Mıńjarǵan" mákan puqaralar jıyını turǵınlarınıń múrájatı qısqa múddetlerde óziniń unamlı sheshimin taptı.

Xosh mashqala neden ibarat edi?

Búgingi kúnge shekem "Mıńjarǵan" mákan puqaralar jıyını aymaǵındaǵı "Vatanparvar" kóshesindegi unamsız jaǵday transport basqarıwshıları ushın da, piyadalar ushın da, ásirese,  mektepke qatnaytuǵın ul-qızlarǵa ádewir qolaysızlıqlar  tuwdırıp keldi.

 Rayonnıń 3-sektor baslıǵı, (ishki isler bólimi baslıǵı) polkovnik B.Bulatov usı mashqala boyınsha "Mıńjarǵan"mákan puqaralar jıyını turǵınları menen júzbe-júz  ushırasıp, olardıń múrájatlerin tıńladı.

Áhmiyetlisi, jollardı tártipke keltiriw boyınsha puqaralardıń talabı qanaatlandırılıp, qısqa múddette usı kóshede ońlaw jumısları alıp barıldı.

Qońırat rayonınıń sektor baslıqları óz aymaqlarındaǵı social-ekonomikalıq mashqalalardı anıqlaw xám onıń sheshimin tabıw maqsetinde  orınlarda kóshpeli qabıllawlar, ushırasıwlar shólkemlestirip, xalıq penen júzbe-júz sáwbetler ótkermekte.

Rayonda xalıq penen ushırasıwlar payıtında anıqlanǵan xár bir máseleniń úlken yaki kishiligine qaramastan, turaqlı qadaǵalawǵa alınǵan.

Tómende "Vatanparvar" kóshesinde ońlaw jumısların alıp barıw procesinen kórinis.




G.Qarajanova.

«Qońırat haqıyqatı» gazetasınıń redaktorı