22.03.2019, Juma

Jámiyetlik qáwipsizlikti támiyinlewdegi wazıypalar belgilendi


 Usı jıl 9-mart kúni Qaraqalpaqstan Respublikası Joqarǵı Keńesinde jınayatshılıqqa qarsı gúresiw hám onıń aldın alıw, jámiyetlik qáwipsizlikti támiyinlew boyınsha bıyılǵı jıldıń ótken eki ayında islengen jumıslardıń juwmaǵı, aldaǵı úsh ayda ámelge asırılıwı tiyis wazıypalarǵa baǵıshlanǵan  májilis bolıp ótti.

 Videoselektor tárizinde ótkerilgen ilajǵa Arqa-batıs áskeriy okrugi, Milliy gvardiya, Prokuratura, Ishki isler ministrligi hám basqa da huqıq qorǵaw uyımlarınıń, Kegeyli, Qońırat, Moynaq hám Ámiwdárya rayonlarınıń 4 sektor basshıları, ministrlikler menen jámiyetlik shólkemlerdiń, ǵalaba xabar qurallarınıń wákilleri qatnastı.

Ilajdı Qaraqalpaqstan Respublikası Joqarǵı Keńesiniń Baslıǵı M. Erniyazov basqarıp bardı.



Bunnan keyin Ózbekstan Respublikası Prezidenti janındaǵı Qáwipsizlik keńesiniń xatkeri V.Maxmudov, Ózbekstan Respublikası Ishki isler ministri P.Babajanov shıǵıp sóylep,  bıyılǵı jıldıń ótken aylarında islengen jumıslar, alda turǵan wazıypalarǵa toqtap ótti.

Atap ótilgenindey, usı jıldıń 10-fevral kúni  bolıp ótken májiliste, huqıqbuzarlıqlar profilaktikası hám jámiyetlik qáwipsizlikti támiyinlew baǵdarında ótken jılı jol qoyılǵan kemshilikler talqılanıp, alda  turǵan wazıypalar belgilep berilgen edi. Sonıń menen birge, «Jol kartası» tastıyıqlanıp, onıń orınlanıwı qadaǵalawǵa alındı.


Ózbekstan Respublikası Prezidentiniń 2018-jıl 4-dekabrdegi «Qaraqalpaqstan Respublikasında jámiyetlik tártipti saqlaw hám huqıqbuzarlıqlar profilaktikası sistemasınıń nátiyjeliligin arttırıw ilajları haqqında» biyligi tiykarında arnawlı shtab dúzilip, Arqa-batıs áskeriy okruginde 94 saatlıq oqıw kursı shólkemlestirildi. Onı búgingi kúnge shekem úsh júzge shamalas ishki isler uyımları xızmetkeri  tabıslı tamamlap, olardıń kásiplik tayarlıǵın arttırıwda ayrıqsha áhmiyetke iye bolmaqta. Tıńlawshılar kurstan bos waqıtlarında Milliy gvardiyanıń áskeriy xızmetkerleri menen birge Nókis qalasında 49 baǵdar boyınsha puqaralardıń qáwipsizligin támiyinlew, jınayatshılıqqa qarsı gúresiw baǵdarında jumıs alıp barmaqta.

Belgilengen rejege muwapıq, respublikamız aymaǵındaǵı 411 ózin-ózi basqarıw uyımındaǵı, 706 oqıw ornındaǵı 18,7 mıńnan aslam oqıwshı-jaslardıń qatnasında 263 márte ruwxıy-aǵartıwshılıq, 171 márte huqıqıy, 261 márte áskeriy-Watandı súyiwshilik, 231 márte sport jarısı ótkerildi. Ótken qısqa dáwirde ámelge asırılǵan bul ilajlar óziniń unamlı nátiyjesin bermekte.


Ózbekstan Respublikası Prezidentiniń 2018-jıl 24-dekabrdegi «Jámiyetlik qáwipsizlikti támiyinlewdiń nátiyjeliligin arttırıw boyınsha qosımsha ilajlar haqqında»ǵı qararı tiykarında profilaktika inspektorlarınıń jámiyetlik tártipti saqlaw boyınsha járdemshisi lawazımına talabanlardıń dizimi qáliplestirilmekte. Jınayatshılıqqa qarsı gúresiw hám onıń aldın alıwda Ózbekstan Respublikası Prezidenti janındaǵı Qáwipsizlik keńesi,  Huqıqbuzarlıqqa qarsı gúresiw boyınsha respublikalıq komissiya, Ózbekstan Respublikası Ishki isler ministrligi jaqınnan járdem bermekte.

Ilajda Qaraqalpaqstan Respublikası Ministrler Keńesiniń Baslıǵı Q. Sariev, Ózbekstan Respublikası Ishki isler ministriniń orınbasarı R.Xatamov, Ózbekstan Respublikası Qorǵanıw ministriniń orınbasarı A.Ikramov, Qaraqalpaqstan Respublikası Ishki isler ministri A.Temirxanov, Qaraqalpaqstan Respublikası Prokurorınıń birinshi orınbasarı T.Nurmetov, Milliy gvardiyanıń topar komandiri M.Yusupov, Qaraqalpaqstan Respublikası Ministrler Keńesi Baslıǵınıń orınbasarı, respublikalıq Hayal-qızlar komitetiniń baslıǵı Z.Ibragimova shıǵıp sóylep, alda turǵan wazıypalarǵa toqtap ótti.


Májiliste Kegeyli, Qońırat, Moynaq hám Ámiwdárya rayonları 4 sektor basshılarınıń jınayatshılıqqa qarsı gúresiw hám onıń aldın alıwda jol qoyılǵan kemshiliklerden tiyisli juwmaq shıǵarıw boyınsha málimlemeleri tıńlandı hám bul boyınsha tiyisli qarar qabıl etildi.

D.ABIBULLAEV,

Qaraqalpaqstan xabar agentliginiń sholıwshısı.