19.05.2019, Ekshembi

SOCIALLĺQ TARAWDĺ RAWAJLANDĺRĺWǴA ITIBAR


Usı jıl 11-mart kúni Qaraqalpaqstan Respublikası Joqarǵı Keńesinde 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasın «Jedel investiciyalar hám sociallıq rawajlanıw jılı»nda  ámelge asırıwǵa baylanıslı Mámleketlik baǵdarlamanıń, sonıń ishinde, sociallıq tarawdı rawajlandırıw boyınsha wazıypalardıń orınlanıwına baǵıshlanǵan seminar bolıp ótti.


Videoselektor tárizinde ótkerilgen ilajǵa Ózbekstan Respublikası Oliy Majlisi Senatınıń aǵzaları, Qaraqalpaqstan Respublikası Joqarǵı Keńesiniń deputatları, tiyisli ministrlikler menen shólkemlerdiń, ǵalaba xabar qurallarınıń wákilleri qatnastı.

Seminardı Qaraqalpaqstan Respublikası Joqarǵı Keńesiniń Baslıǵı M. Erniyazov basqarıp bardı.


Bunnan keyin Ózbekstan Respublikası Oliy Majlisi Senatı Baslıǵınıń birinshi orınbasarı S.Safoev shıǵıp sóylep, Mámleketlik baǵdarlamada Qaraqalpaqstan Respublikasında sociallıq tarawdı rawajlandırıw boyınsha ámelge asırılıwı tiyis bolǵan wazıypalarǵa toqtap ótti.

Atap ótilgenindey, búgingi kúni Prezidentimizdiń basshılıǵında elimiz ekonomikasınıń barlıq tarawlarında túpkilikli ózgerisler menen jańalanıwlar júz bermekte.  Prezidentimiz tárepinen qabıl etilip atırǵan Pármanlar menen qararlar sociallıq-ekonomikalıq rawajlanıwlarda, xalqımızdıń baxıtlı jáne abadan turmısın támiyinlewde ayrıqsha áhmiyetke iye bolmaqta. Sonıń ishinde, isbilermenlikti rawajlandırıw, zamanagóy iri kárxanalardı iske túsiriw, bilimlendiriw, densawlıqtı saqlaw, mádeniyat hám sport obektlerin qurıw baǵdarında keń kólemli dóretiwshilik jumıslar alıp barılmaqta.


Tarawdaǵı keń kólemli reformalar xalqımızdıń turmısınan razı bolıp jasawına, perzentlerimizdiń kámil insanlar bolıp jetilisiwi jolındaǵı iygilikli islerge xızmet etpekte. Ótken jıldıń ózinde 163 milliard sumlıq qarjı esabınan 22 ulıwma bilim beriw mektebinde, 51 mektepke shekemgi bilimlendiriw mákemesinde, 22 densawlıqtı saqlaw hám 5 balalar sportı obektinde qurılıs hám ońlaw jumısları alıp barılıp, paydalanıwǵa tapsırılǵanı bunıń ayqın mısalı bolıp tabıladı.

Bunnan tısqarı, «Abat awıl» hám «Abat máhálle» baǵdarlamaları tiykarında 81 sociallıq obektte 45,7 milliard sumlıq remont jumısları ámelge asırıldı.

Ózbekstan Respublikası Prezidenti SH.Mirziyoevtiń ótken jıldıń 15-16-noyabr kúnleri respublikamızǵa saparı dawamında qala hám rayonlarımızdı sociallıq-ekonomikalıq jaqtan rawajlandırıw, isbilermenlikke keń jol ashıw, sırt el investiciyaların tartıw, xalqımızǵa barlıq qolaylı jaǵdaylardı jaratıw boyınsha áhmiyetli wazıypalardı belgilep bergen edi.  Bul baǵdarda bıyılǵı jılı 54 sociallıq obektte 185 milliard sumǵa shamalas qarjı esabınan qurılıs-ońlaw jumısların alıp barıw rejelestirilmekte. Sonıń ishinde, 19 ulıwma bilim beriw mektebinde 44,4  milliard sumlıq, 4 Balalar muzıka hám kórkem óner mektebinde 15,9 milliard sumlıq, 18 mektepke shekemgi bilimlendiriw mákemesinde 53,6 milliard sumlıq, 11  densawlıqtı saqlaw obektinde 41,6 milliard sumlıq qurılıs hám rekonstrukciya jumısları alıp barıladı.


Jáne bir áhmiyetli tárepi sonda, 2019-2020-jıllar dawamında 11 trillion 282 milliard sumlıq investiciya esabınan jámi 793 joybardı ámelge asırıw jumısları baslap jiberildi. Prezidentimizdiń respublikamız, sonıń ishinde Moynaq rayonı xalqına bolǵan ayrıqsha itibarı nátiyjesinde rayondı komplekli rawajlandırıw boyınsha arnawlı baǵdarlama qabıl etilip, usı tiykarda 2019-2021-jıllarda 1 trillion 485 milliard sumlıq qurılıs hám rekonstrukciya jumısların alıp barıw názerde tutılmaqta. Sonnan bıyılǵı jıldıń ózinde, 622 milliard sumlıq qarjı esabınan 40 sociallıq obektte qurılıs-ońlaw, 20 kóp qabatlı turaq jayda qurılıs jumısları baslap jiberildi. Ulıwma usı jıllar dawamında Moynaq rayonında sanaat, xızmet kórsetiw hám awıl xojalıǵı tarawlarında 26 trillion 975 milliard sumlıq 75 joybardı ámelge asırıw jumısları alıp barıladı.

Ilajda Qaraqalpaqstan Respublikası Bántlik hám miynet qatnasıqları ministri U.Saburov, Densawlıqtı saqlaw ministri D.Xodjiev, Mádeniyat ministri Q.Turdiev, Xalıq bilimlendiriw ministri A.Ayapov, «Nuraniy» qorı Qaraqalpaqstan bóliminiń baslıǵı SH.Usnatdinov shıǵıp sóylep, «Jedel investiciyalar hám sociallıq rawajlanıw jılı» Mámleketlik baǵdarlaması talapların orınlaw boyınsha ámelge asırılıp atırǵan jumıslar, alda turǵan wazıypalarǵa toqtap ótti.


D.ABIBULLAEV,

Qaraqalpaqstan xabar agentliginiń sholıwshısı.